DILI, 24 Outobru 2025 (TATOLI)—Organizasaun Internasionál Aviasaun Sivíl (ICAO, sigla inglés) rekomenda ba Administrasaun Aeroportu no Navegasaun Aérea Timor-Leste, Empreza Públiku (ANATL, E.P), atu hadi’a sistema no mós fasilidade iha aeroportu Komoro tuir estandar internasionàl atu prienxe kritéria ICAO nian.
Prezidente Administrasaun Aeroportu no Navegasaun Aérea Timor-Leste, Romualdo da Silva, hateten kona-ba rezultadu enkontru auditória ho ICAO, sira rekomenda ba ANATL atu hadi’a fasilidades balun ne’ebé presiza kompleta hanesan rede protesaun ne’ebé sai hanesan seguransa, kona-ba kartaun asesu (Acses Pass), kondisaun gate (garasi) inklui mós kondisaun sira seluk ne’ebé iha hodi prienxe tuir padraun ICAO nian.
“Ami mós haree hela meiu atu moderniza kartaun asesu ba aeroportu tanba durante ne’e ema barak mak uza. Nune’e, ita presiza hadia atu ema hotu bele prienxe rekezitu hodi asesu ba aeroportu,” Prezidente ANATL ne’e informa ba jornalista sira iha nia kna’ar fatin, kinta ne’e.
Rekomendasaun hirak ne’e, nia dehan, ANATL sira prepara ona hein katak iha tempu badak bele implementa rekomendasaun ne’ebé presiza hadi’a.
“Enkuantu kona-ba monta rede protesaun nian, ami sei koordenasaun ho autoridade lokál sira iha suku Madohi atu taka tiha rede sira-ne’ebé ho kondisaun kuak no troka foun fali,” nia hateten.
Aleinde ne’e, Timor-Leste mós hahú ona sai membru plenu ba ASEAN, entaun ida-ne’e mós hanesan rekezitu ida-ne’ebé TL presiza prienxe, ho nune’e mak sira halo ona diálogu ho komunidade afetadu sira atu koopera hodi dezenvolve espansaun aeroportu ida-ne’e ho di’ak.
“Projetu konstrusun ba aerportu ida-ne’e sei fahe ba pakote tolu, husi parséria dezenvolvimentu JICA sei halo terminál, banku ADB liuhusi kompania Wakita Karya sei halo estensaun pista inklui fasilidade sira seluk,” nia dehan.
Normalmente, ba oin, Timor-Leste tenke kompleta rekezitu hirak ne’e to’o tinan 2028 ne’e, aeroportu Internasionál Prezidente Nicolau Lobato, Komoro ne’e, tenke ho kondisaun ne’ebé kompletu ona.
Jornalista : Alexandra da Costa
Editór : Cancio Ximenes
