Ramos-Horta no José Lobato diskute futuru Bayu Undang
DILI, 24 Outubru 2025 (TATOLI) – Prezidente Repúblika José Ramos-Horta hasoru malu ho Jerente Nasionál Kompañia Santos, José Lobato, hodi diskute kona-ba futuru Bayu Undang nian bainhira nia produsaun paradu tiha ona iha fulan-Juñu liu-ba.
“Enkontru ho Prezidente Repúblika ne’e sentra liu-liu ba proposta husi Santos atu investe iha fasilidade ida-ba Kaptura no Armazenamentu Karbonu (CCS), ne’ebé sei uza fali rezerva mamuk ona hodi rai CO2. Investimentu foun potensiál ida-ne’e reprezenta faze krítika tuir mai ba infraestrutura enerjia iha Timor-Leste,” José Lobato hateten ba jornalista sira hafoin remata enkontru ho Ramos-Horta iha Palásiu Prezidensiál, Prezidente Nicolau Lobato Dili, foin lalais ne’e.
Nia dehan, durante enkontru Prezidente Ramos-Horta preokupa tebes ho futuru empregu ba sidadaun timoroan na’in-60 ne’ebé agora daudaun servisu hela iha dekomisionamentu Bayu Undang.
“Ho sira-nia kontratu ne’ebé sei ramata iha fulan-Marsu/Abríl tinan oin, Prezidente subliña nesesidade atu buka solusaun ba forsa traballu ho kualifikasaun ida-ne’e,” Lobato dehan.
Nia hatutan, diskusaun sira hatudu momoos katak investimentu futuru husi Santos depende ba hetan akordu ida-ne’ebé fó benefísiu ba parte rua (2) ho Governu kona-ba projetu CCS ne’ebé sira propoen.
Maske produsaun Bayu Undang nia ramata ona, José Gonçalves fó sai legadu pozitivu husi projetu ne’e iha dezenvolvimentu forsa traballu timoroan ho kualifikasaun aas.
Iha ámbitu hasoru malu, José Lobato hato’o mós konvite ida (1) ba Prezidente Ramos-Horta atu vizita eskritóriu Santos nian iha Dili hodi hasoru enjeñeiru no dezeñadór Ttmoroan sira-ne’ebé agora daudaun kontribui hela ba projetu internasionál sira inklui iha Austrália.
Tanba ne’e, Prezidente Ramos-Horta rekoñese dezenvolvimentu ida-ne’e nu’udar testemuña ba kapitál umanu nasaun nian no espresa ninia kompromisu atu esplora dalan hotu-hotu ba investimentu no oportunidade empregu iha futuru.
Jornalista : Hortencio Sanchez
Editór : Cancio Ximenes
