OEKUSI, 27 Outubru 2025 (TATOLI) – Ekipa husi Ministériu Ensinu Superiór Siénsia no Kultura (MESSK), segunda ohin, hahú halo inskrisaun ba estudante sira iha Rejiaun Administrativa Espesiál Oekusi Ambeno (RAEOA) atu asesu ba Universidade Nasionál Timor-Leste (UNTL) no Institutu Poletéknika Betanu (IPB) ano letivu 2026.
Koordenadór Tékniku ba rejistrasaun husi MESSK, Agustinho de Souza Gama da Costa, informa, ba kritériu kona-ba prosedimentu atu asesu ba UNTL no IPB, antes ne’e parte Ministériu fó-sai ona informasaun liuhusi públikasaun iha midía sira, no diseminasaun informasaun ba dirijente eskola, autoridade lokál atu kontinua partilla tutan informasaun ne’e iha baze.
Nune’e parte Ministériu Solidariedade Sosiál no Konsellu veteranu mós fó-sai ona informasaun ba estudante sira kona-ba kritériu saida de’it mak bele rejistu to’o ezame atu asesu.
“Rejistu ne’e iha rejime rua, jerál no espesiál, ba rejíme espesiál iha sub-rejime oportunidade ba espasu ba estuante sira-ne’ebé akaba ona iha tinan-2021 mai to’o 2024, kona-ba rejíme jerál mak ba kandidatu ne’ebé foin partisipa ezame nasionál iha 2025 ne’e, sira mós bele asesu ba sub-rejíme hakbi’it ho oan veteranu nian,” nia hateten iha salaun edukasaun Oekusi, ohin.
Notísia relevante:MESSK disemina kritériu rejime jerál no espesiál asesu UNTL-IPB iha Oekusi
Diretór Edukasaun Oekusi, Vincencio Cono, espera, estudante sira-ne’ebé finalista ona hahú husi 2021 to’o 2025 bele halo inskrisaun nune’e bele asesu ba UNTL no IPB ba no letivu 2026 nian.
“Ne’e tempu oportunu ba Oekusi-oan sira-ne’ebé ramata ona ensinu sekundáriu, tan ne’e antes ne’e mós ami fó-sai ona avizu ba dirijente eskola sira inklui Konsellu-Suku, katak hahú ohin to’o sesta semana ne’e tenke prepara dokumentu atu sai rejista, atu sira-bele asesu, tanba universidade rua ne’e Governu nian, entaun fó biban ba sidadaun hotu bele rejista,” nia hateten.
Notísia relevante:MESSK introdus rekizitu legalizasaun diploma no estabelesimentu kursu foun iha Oekusi
Entretantu, dokumentu ofisiál ne’ebé Ajénsia Tatoli,I.P asesu fó sai husi Ministériu Ensinu Superiór Siénsia no Kultura, katak, bazeia ba Diploma Ministeriál númeru 20/2025, loron 09 fulan-Jullu, prevista iha ártigu 14, sub-rejéme espesiál mak Ministériu Ensinu Superiór Siénsia no Kultura liu-husi komisaun asesu ensinu superiór públiku ba tinan akadémiku 2026 hahú hala’o rejistu ba kandidatu ba rejime espesiál ho nia sub rejime mak hanesan:
- Ba rejíme oportunidade prioridade ba kandidatu sira-ne’ebé ramata ona ensinu sekundáriu jerál no ensinu sekundáriu tékniku vokasionál tinan haat (4) ba kotuk husi 2021 to’o 2024. Kandidatu husi sub rejime ida-ne’e tenke halo rejistu tuir munisípiu ne’ebé sira ramata nia estudu.
- Kandidatu tenke iha klasifikasaun mínima ba matéria espesifíku hodi asesu ba UNTL no IPB. Kandidatu sira tenke tuir ezame. Loron no fatin hala’o inskrisaun ba kandidatura UNTL no IPB, husi husi loron 27 to’o 31 Outubru iha edifísiu edukasaun munisipál idak-idak.
- Nune’e mós dokumentu obrigatóriu atu halo inskrisaun ba kandidatura sira, tenke aprezenta kópia dokumentu identidade kartaun eleitorál no Billete Identidade, kópia sertidaun batizmu no sertidaun RDTL tahan ida. Kópia diploma ikus ensinu sekundáriu jerál no ensinu sekundáriu tékniku vokasionál no tenke hetan legalizadu husi Ministériu Edukasaun no foto kolorida 3×4 tahan haat (4). Mapa kór mean ba ensinu sekundáriu jerál ba siénsia sosiál Sosiál Humana no mapa kór azúl ba ensinu sekundáriu jerál siénsia téknolojia. Mapa kór matak ba ensinu sekundáriu tekniku vokasionál.
Loron no fatin atu realiza ezame asesu ba UNTL no IPB
Iha loron 02 fulan Dezembru 2025 ba área siénsia no teknolojia no loron 03 fulan-Dezembru 2025 ba área siénsia Sosiál Humana, nune’e mós iha loron 04 fulan Dezembru 2025 ba ensinu sekundáriu tékniku vokasionál. Kona-ba fatin ezame sei halo liña koordenasaun ho servisu edukasaun munisípiu idak-idak.
Jornalista: Abílio Elo Nini
Editór: Rafael Ximenes de A. Belo
