BTL, E.P-DNRAS diskute kona-ba sistema perfurasaun bee iha Kamea-Has Laran
DILI, 10 Novembru 2025 (TATOLI)—Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, enkontru ho Diretór Diresaun Nasionál ba Regulasaun Bee no Saneamentu (DNRAS, sigla portugés) ho tékniku DNRAS nian, iha Prezidente nia kna’ar fatin BTL, E.P, kaikoli.
Tuir nota ne’ebé Agência Tatoli asesu ne’e haktuir, iha enkontru ne’e diskute kona-ba sistema perfurasaun ne’ebé lokaliza iha Kamea, Haa Laran no entrega perfurasaun ne’e husi DNRAS ba BTL, E.P hodi operasionaliza sistema perfurasaun ne’e, nune’e bele fornese bee-moos ba komunidade iha área Kamea nian.
Obra perfurasaun bee ne’e ezekuta hosi Institutu Jeosiénsia Timor-Leste (IGTL, sigla portugés) no IGTL rasik entrega ona obra perfurasaun ne’e ba MOP liuhusi DNRAS.
Parte Autoridade Reguladora DNRAS mai entrega ofisialmente ba BTL, E.P xave painel no dokumentu sira husi sistema bomba ne’e nian, atu BTL, E.P bele halo jestaun ba rekursu ne’e.
Ho nune’e, iha tempu besik, ekipa téknika BTL, E.P sei tun ba observa sistema perfurasaun ne’e, hodi halo 𝑝𝑢𝑚𝑝𝑖𝑛𝑔 𝑡𝑒𝑠𝑡, molok BTL, E.P promove hodi halo melloramentu.
TATOLI
