HNGV prepara pesoál 20-resin halo teste saúde ba kadetes foun PNTL
DILI, 10 Novembru 2025 (TATOLI)—Diretór Klíniku HNGV, Arcanjo Nunes, hateten daudaun ne’e Hospital Nacional Guido Valadares (HNGV) prepara ona pesoal saúde hamutuk 20-resin atu halo teste saúde ba kadetes foun Polisia Nasionál Timor Leste (PNTL).
Notísia Relevante: Kandidatu PNTL sira sei hakat ba teste fíziku no entrevista iha 06 Novembru
Diretór Klíniku ne’e informa, HNGV prepara ona rekursu umanu hodi halo teste ba kadetes foun ne’ebé bazeia ba pedidu husi Polisia Nasionál Timor-Leste.
“Prepara rekursu uumanu tanba sira-nia pedidu mai ona HNGV fulan ida liuba, maibé bainhira mak realiza ne’e seidauk,tanba sei koordena hela. Agora sira sei iha hela teste fíziku nia laran,” Arcanjo Nunes hateten ba jornalista sira iha HNGV, Bidau, ohin.
Nia hatutan, numeru totál kadetes foun PNTL na’in hira mak mai atu tuir teste saúde ne’e seidauk iha, tanba kadetes foun sira sei hala’o teste fíziku nian.
Dirijente ne’e hateten, HNGV sei prepara ekipa sira ahnesan pesoál saúde na’in-haat (4) koloka ba hasai raiu-x, na’in -tolu ba laboratóriu, doutór ida ba teste psikolojia nian, doutór ida ba teste tilun garganta, doutór ida ba matan, doutor ida ba medisina interna hodi haree ba moras einjerál hanesan, tensaun, raan midar no doutór kardiolojia.
“Hospital Nasional Guido Valadares, kada tinan sempre fó ninia rekursu umanu no lojistika atu apoiu ba PNTL hodi halo teste ba sira-nia kadetes foun sira-nia saúde. Husi rekursu umanu ne’e mak halo teste mak foin bele fó sira-nia rezultadu katak kadetes sira-ne’e pasa ka lae,” nia dehan.
Jornalista : Felicidade Ximenes
Editór : Cancio Ximenes
