MOP-Empreza CNI 22 asina kontratu implementa sistema filtrasaun bee-moos iha Manufahi
DILI, 11 Novembru 2025 (TATOLI)—Ministériu Obra Públika (MOP) no enpreza internasionál China Nuclear Industry 22 (CNI 22) ) kontinua asina kontratu ba implementasaun projetu melloramentu sistema filtrasaun bee-moos iha Manufahi.
Ministru Obra Públika, Samuel Marçal, hateten ohin la’ós asina de’it kontratu ida maibé sira mós asina tan kontratu foun ida ho empreza China Construction hodi implementa projetu fornesieentu bee-moos ba kapitál munisípiu sira hanesan foin dadauk implementa ona iha Lospalos nune’é tuir mai sei implementa iha Manufahi.
“Projetu ne’e hein implementa de’it ona tanba antes ne’e halo rekollamentu dadus entaun prosesu ne’e finál ona nune’e mak ita mós asina ona kontratu,” Ministru Samuel hateten.
Governante ne’e dehan, fornesementu bee-moos ne’e benefisiáriu na’in-5000 iha villa laran sei asesu hotu tanba Governu gasta osan millaun $15.
Reprezentante Emprezaa China Nuclear Industry 22 (CNI 22), Dai Linfeng, hato’o agardesementu ba Governu ne’ebé kontinua fó fiar ba sira hodi implementa servisu kona-ba dezenvolvimentu infraestrutura sira, ida-ne’e mak sira-nia kompromisu atu servisu hamutuk ho Governu Timor-Leste iha kualkér projetu infraestrutura nian.
“Ami komprometidu atu implementa projetu ida-ne’e ho di’ak no kualidade tuir kapasidade ne’ebé ami iha atu Governu labele lakon fiar mai ami,” nia dehan.
Aleinde ne’e, nia dehan, tanba sira-nia konstrusaun ne’e harii iha Timor kuaze tinan 16 ona ,nune’e servisu parséria ida-ne’e la’ós foin pasu dahuluk nian, nune’e sira sei esforsu hodi halo tuir saida mak Governu hakarak fó ba ninia povu.
Projetu ne’e implementa husi Empreza Internasionál China Nuclear Industry 22 (CNI 22) durante tinan ida ho balun no uza fundu imprestímu husi Banku Dezenvolvimentu Aziátiku (ADB, sigla portugés) ho montante millaun $15.
Jornalista : Alexandra da Costa
Editór : Cancio Ximenes
