MOP-PT Nusantara asina kontratu hodi konstrui edífisiu MOP iha Kolmera
DILI, 11 Novembru 2025 (TATOLI)—Ministériu Obra Públika (MOP) asina kontratu ho Empreza Indonézia PT Nusantara Konstruksi Enjinering TBK, hodi konstrui edífisiu foun Ministériu Obra Públika iha edifísiu anterior Institutu Jestaun Ekipamentu Apoiu Dezenvolvimentu Infraestrutura (IGEADE) ne’ebé lokaliza iha Kolmera.
Ministru Obra Públika, Samuel Marçal, hateten konstrusaun edifísiu ida-ne’e atu mellora servisu ministériu nian atu kontinua iha liña koordenasaun ba malu.
“Tanba ne’e, ohin loron, ita asina kontratu ho kompañia para haruka ba tibunál kontas atu projetu ne’e bele implementa ona. Tanba, durante ne’e sira enfrenta problema koordenasaun ba malu, tanba instituisaun tutelada sira la konsentra hamutuk iha fatin ida,” Ministru Samuel informa ba jornalista sira iha ninia kna’ar fatin, Kaikoli, ohin
Ifa-ne’e hanesan kestaun problemátiku ba jestaun iha ministéria ninian, entaun bainhira konstrusaun ne’e konklui ona sei akumula instituisaun tutelada sira no edifísiu anteriór sei entrega ba fali parte dirasaun nian hodi halo fali jestaun servisu nian.
” Entaun ita halo edifísiu boot ida-ne’e la’ós atu bolu malu ba servisu de’it no tuur iha AC laran maibé tamna Ministériu ida-ne’e nu’udar instituisaun boot ne’ebé resposabiliza kona-ba asuntu infraestrutura nian. Nune’e, presiza espasu fatin ne’ebé di’ak atu ema bele iha vontade servisu, fiar katak ho edifísiu foun ne’e funsionáriu sira bele hala’o nia nia profisaun ho di’ak liután,” nia hateten.
Diretór Ezekutivu PT Nusantara Konstruksi Enjinering TBK, Djoko Prabowo, hato’o agradesementu ba parte hotu ne’ebé simu sira ho laran di’ak liuliu Governu ne’ebé fó fiar ba empreza hodi hala’o konstrusaun ba edifísiu foun MOP nian.
“Obrigadu ba konfiansa ne’e, ami sei esforsu-an atu hala’o servisu ne’e ho di’a- liu hodi hetan apoiu husi ami-nia parseiru sira tanba ita-nia serbisu iha ne’e la’ós ba dahuluk iha Timor-Leste maibé desde iha tinan 2010 kedas ami hala’o ona servisu iha área seluk no projetu barak,” nia hateten.
Nune’e, nia dehan, loron ohin sai hanesan pasu di’ak ida atu bele hala’o serbisu iha Timor-Leste, hodi apoiu dezenvolvimentu iha futuru.
Projetu ne’e sei implementa husi Empreza PT Nusantara Konstruksi Enjinering TBK Indonézia, durante tinan ida ho balun ne’ebé uza fundu insfraestrutura ho montante millaun $15-resin.
Jornalista : Alexandra da Costa
Editór : Cancio Ximenes
