BOBONARU, 18 Novembru 2025 (TATOLI)-Projetu konstrusaun saladeaula neen iha Ensinu Baziku Sentrál (EBC, sigla portugés) Samutaben, iha suku Manapa, postu administrativu Kailaku, munisípiu Bobonaru daudaun ne’e to’o ona 92%.
Tékniku empreza Lislap Unipessoal Lda, Angelino Araújo, informa katak, tuir planu, sei entrega sala prontu ne’e ba Autoridade munisípiu Bobonaru iha loron 15 fulan-Dezembru.
Notísia relevante: Sala tolu iha EBC Samutaben la dignu ba estudante sira
“Konstrusaun ida-ne’e agora tama ona faze finishing, signifika katak hela de’it 8% para finaliza. Parte finishing hanesan hadi’a ai-riin sira ne’ebé presiza atu halo kabeer liután, tara-odomatan, sasán sintina nian no seluk tan ami iha kompromisu iha dezembru ne’e sei finaliza”, nia informa ba Tatoli, ohin.
Angelino Araújo subliña katak parte empreza garante obra ne’e sei hatudu rezultadu ne’ebé di’ak no kualidade. “Ami bazeia ba dezeñu no Bill of Quantity no standard husi PDIM. Ami hala’o ninia MPA no speack mós bazeia ba padraun ne’ebé sira fó”, nia afirma.
Komunidade Samutaben, Lúcio Pereira, reprezenta inan-aman estudante sente kontente ho implementasaun obra ne’e. “Ami agradese tanba tinan foun 2026 oan sira bele eskola ona iha fatin foun, sira la ta’uk ona, tanba fatin ne’e seguru kompara ho uluk ne’e plafón nakles atu monu tan sira mós nafatin uza to’o foin lais fulan-Maiu ne’e mak sobu”, nia realsa.
Tuir dadus, iha tinan letivu 2025, EBC Samutaben akumula estudante hamutuk 390 husi primeiru to’o terseiru siklu no totál profesór na’in-17.
Projetu ne’e implementa ho orsamentu Planu Dezembolvimentu Integradau Munisipál (PDIM) 2025 ho nia montante $162.251,45.
Notisía relevante: Konstrusaun EBC Samutaben sei finaliza molok ezame nasionál
Jornalista: Sérgio da Cruz
Editora: Maria Auxiliadora
