CCI-TL husu Governu buka solusaun ba problema investimentu
DILI, 25 Novembru 2025 (TATOLI)–Prezidente Kamára Komérsiu Indústria Timor-Leste (CCI-TL, sigla portugés), Jorge Serano, husu ba Governu atu buka solusaun ba problema investimentu iha Timor-Leste, tanba investór nasionál no internasionál barak dúvida atu investe iha Timor-Leste.
“Hanesan Prezidente CCI-TL ha’u nafatin husu, tenke buka solusaun hodi rezolve problema sira hotu. Ita agora tama ona ba ASEAN no Organizasaun Mundiál Komersiu (OMK), oinsá ita atu faan produtu sira, tenke ko’alia ho parte polítiku sira atu ita diskute hamutuk,” Jorge Serano hateten iha Hotel Palm Spring, Fatuhada, tersa ne’e.
Nia dehan, problema balun mós iha parte Terra no Propriedade kona-ba servisu kadastrál oinsá atu buka solusaun ba difikuldade ne’ebé iha.
“Ita hatene, iha Timor, agora Broker mós barak, ema ruma husu rai ho luan maka’as, ezemplu ektare millaun lima (5) entaun fó uluk ektare millaun rua (2), ita-boot investe la to’o mak Governu fó tan. Tanba, dala barak Governu fó tiha rai kuaze ektare barak la konsege halo investimentu rai sai abandona de’it. Kuitadu, ita-nia rai kiikoan tan, ema barak mak kuaze okupa rai barak liu, ida ne’e presiza haree didi’ak,” Jorge dehan.
Tanba ne’e, nia husu ba Governu atu kontrola didi’ak tanba iha Timor-Leste daudaun ne’e Broker barak sai mafia ba faan rai.
Iha parte seluk, nia husu ba Governu liuliu Ministériu Obra Públika liuliu Diresaun Abitasaun Urbanizmu atu aprezenta konseitu abitasaun Timor-Leste nian no modelu saida mak atu bele implementa.
“Ministériu Obra Públika Diresaun Abitasaun Urbanizmu, iha ona konseitu abitasaun Timor ka lae, modelu saida mak atu uza, iha ona planu ba investe sidade Dili ka lae, atu nune’e bele diskute no ema hatene. Iha fatin ida tau Pertamina nia sorin ne’e iha fali Restaurante ida, iha sorin ne’ebá fahi-luhan ida, ne’e saida mak ne’e, tenke haree sasán sira-ne’e atu bele dezenvolve Dili ne’e,” nia dehan.
Maske nune’e, nia apresia ba Sekretariu Estadu Asuntu Toponímia Organizasaun Urbana (SEATOU) ne’ebé ho aten-brani dudu Dili laran liuliu rai Estadu ne’ebé okupa husi populasaun sira.
“Ita fó apresiasaun ba SEATOU tanba nia brani xoke, nia brani sobu. Ohin loron, ita haree dalan barak mak loke ona iha kapitál Dili, hanoin ba oin tenke halo nafatin servisu ne’ebé di’ak hodi dezenvolve Dili no ita-nia nasaun ne’e,” nia dehan.
Jornalista : Hortencio Sanchez
Editór : Cancio Ximenes
