CCI-TL husu Governu halo sertifikasaun laboratóriu ba produtu hodi garante kualidade
DILI, 28 Novembru 2025 (TATOLI)—Camara Komérsiu Indústria Timor-Leste (CCI-TL, sigla portugés) husu ba Governu liuhusi Ministériu Komérsiu Indústria atu halo sertifikasaun ba produtu ne’ebé empreza mikro pekeña sira prodús hodi garante kualidade ba konsumidór.
Renponsavel Asuntu ASEAN no WTO iha CCI-TL, Sidonio Freitas, hateten hanesan CCI-TL sai mahon ba setór privadu sira, nune’e tenke servisu hamutuk ho Governu atu fasilita sertifikasaun saúde ba produtu, kualidade no esportasaun sira husi setór privadu nian.
“Durante ne’e seidauk iha sertifikasaun ba produtu husi ita-nia setór privadu sira, entaun difikulta ba sira atu hetan lisensiamentu hodi halo esportasaun ho kuantidade ne’ebé mak boot. Tanba ne’e Governu tenke kria instituisaun ida hodi halo sertifikasaun ba produtu,” nia informa ba jornalista sira iha otél Palm Spring, Kampung Alor, kinta ne’e.
Diretór Jerál Ministériu Komérsiu Indústria, Martins Magno, hateten bainhira ko’alia kona-ba sertifikasaun tenke iha laboratóriu, entaun daudaun ne’e Institutu Kualidade Timor-Leste (IQTL, sigla portugés) mak iha laboratóriu hodi halo sertifikasaun produtu atu esporta ba rai-li’ur.
“Iha semana kotuk ne’e ami mós haree hela laboratóriu ne’e sufisienta atu halo sertifikasaun, maibé ita presiza hakat ho prosesu ne’ebé neineik, Governu sei esforsu hodi servisu hamutuk ho setór privadu atu investe produtu ho kualidade,” nia dehan.
Jornalista : Alexandra da Costa
Editór : Cancio Ximenes
