SEFOPE anúnsia rezultadu kandidatu 1.061 pasa iha programa RSE Nova Zelándia
DILI, 02 Dezembru 2025 (TATOLI)—Sekretáriu Estadu Formasaun Profisionál no Empregu (SEFOPE) anúnsia rezultadu kandidatu ne’ebé pasa iha prosesu entrevista ba programa servisu Recognaize Seasonal Employer (RSE) Nova Zelándia hamutuk na’in 1.061, kompostu husi feto na’in-361 no mane na’in-700.
Notísia Relevante: Krize ekonomia iha Nova Zelándia la fó impaktu ba rekrutamentu traballadór RSE
Diresaun Nasionál Empregu Estranjeiru (DNEE), João Correia, hateten kandidatu hirak ne’ebé pasa ne’e kompostu husi totál kandidatu na’in-2.186 ne’ebé tuir ezame entrevista iha loron 22 fulan-Outobru to’o 05 fulan-Novembru 2025.
“Kandidatu sira-ne’ebé pasa ona ne’e perkore husi kategória tolu mak very strong kandidatu na’in-92, strong na’in-342 no kategória fair hamutuk na’in 627. Enkuantu kandidatu ne’ebé la pasa hamutuk na’in-811 no kandidatu ne’ebé latuir teste entrevista hamutuk na’in-314,” Diretór Nasionál ne’e hateten liuhusi komunikadu imprensa, ohin.
Aleinde ne’e, dirijente hato’o instrusaun kona-ba rezultadu kandidatu sira-ne’ebé mak pasa sei muda ba RSE work ready pool, kandidatu ne’ebé la pasa ho valór poor sei kontinua tuir kursu lian inglés durante fulan neen (6), hafoin ramata kursu bele fila-fali mak SEFOPE hodi tuir fali prosesu entrevista iha fulan neen (6) oin mai.
“Maibé kandidatu sira-ne’ebé la partisipa iha sesaun entrevista automatikamente nasan sei hasai husi sistema RSE Nova Zelándia nian, karik kandidatu balun ladun satisfeitu no hakarak reklama bele submete ba SEFOPE nia email durante semana ida,” nia dehan.
Jornalista : Alexandra da Costa
Editór : Cancio Ximenes
