2026: SEFOPE sei haruka formadór 14 ba tuir prátika iha CDU Austrália
DILI, 03 Dezembru 2025 (TATOLI)-Sekretária Estadu Formasaun Profisionál no Empregu (SEFOPE) hamutuk ho Charles Darwin University Austrália ba vizita Fundasaun Falur Rate Laek hodi observa formandór na’in-14 ne’ebé hala’o hela formasaun teória durante fulan neen.
Diretór Jerál Sekretária Estadu Formasaun Profisionál no Empregu, Carlito do Rosário Cabral, infrma formadór na’in-14 husi munisípiu 12 inklui RAEOA ne’ebé konklui ona sira-nia formasaun iha Fundasaun Falur Rate Laek, maibé iha tinan 2026 fulan-Fevereiru sira sei kontinua ba tuir formasaun prátika iha Charles Darwin University durante fulan ida.
“Tanba SEFOPE halo akordu no kooperasaun ho Universidade Charles Darwin Austrália no sira-nia mai fó formasaun ba formadór sira durante fulan neen iha fatin ida-ne’e, hafoin ne’e sira sei kontinua tuir prátika fulan ida iha Austrália iha fulan-Fevreiru 2026,” Diretór Jerál ne’e informa ba jornalista sira iha Fundasaun Falur Rate Laek, Mandarin, ohin.
Signifika, nia dehan, sira na’in hirak ne’e sei ba Darwin Austrália atu prátika oinsá uza ekipamentu ho fasilidade bainhira servisu iha Australia, bainhira sira fila mai Timor sei sai formadór hodi fó formasaun ba timoroan ne’ebé prepara-an atu ba servisu iha Austrália.
Adjuntu Ezekutivu TAFE Professional Service Industries, Charles Darwin University (CDU), Rob Schwerdt, hateten formandu sira-ne’e tuir ona formasaun dezde fulan-Maiu no dosente sira husi CDU nian mak mai fó bloku formasaun sira semana rua to’o haat iha tempu ida.
“Estudante sira estuda ona unidade kompeténsia oioin ne’ebé relasiona ho kuidadu ba idozu sira iha Austrália, hanesan parte ida husi kualifikasaun Austrália nian. Hafoin sira kompleta, ami hein no ha’u fiar metin katak sira sei iha abilidade ne’ebé presiza atu servisu iha ambiente kuidadu ba idozu sira,” nia dehan.
Nia dehan, hanesan ohin estudante sira temi katak sira sei bele tau matan ba ema idozu sira ho kuidadu, dignidade no respeitu, no aplika abilidade sira-ne’ebé sei hadi’a duni ema-nia moris no saúde.
Entaun, nia dehan, tinan oin iha semestre dahuluk tinan nian, sira sei hala’o prátika iha servisu fatin iha Austrália iha Territóriu norte, iha ne’ebé sira sei iha esperiénsia kondisaun servisu nian ne’ebé loos iha instalasaun kuidadu idozu sira Austrália nian.
Jornalista : Alexandra da Costa
Editór : Cancio Ximenes
