DILI, 06 Dezembru 2025 (TATOLI) – Organizasaun Juventude, Laudatu Si’ Movement Timor-Leste, realiza semináriu ho tema “Fiar iha Ekolojia no Asaun ba Futuru”, iha salaun Katedrál, Vila Verde, hodi komemora tinan 10 Laudato Si’, dokumentu ne’ebé hakerek husi Papa Francisco iha 2015.
Prezidente husi organizasaun tutela, Isaura Barros, hatete objetivu prinsipál husi eventu ne’e atu hatutan mensajen Papa Francisco nian iha dokumentu Laudato Si’, ne’ebé hakerek husi Pontífise iha tinan 2015, iha ne’ebé bolu atensaun sosiedade hotu hodi kuidadu planeta hanesan uma ba ema hotu.
“Husi deklarasaun ne’e oinsá mak bele integra Laudato Si’iha Igreja, ne’ebé sai hanesan dokumentu daruak Papa Francisco nian ne’ebé hakerek ho lian italianu iha nia tema hateten katak hahii ba Na’i, no nia subtema mak, tau matan ba ita-nia uma knua. Objetivu husi publikasaun ne’e tanba haree ba krize ekolojia, kauza husi ema-nia asaun ne’ebé kontribui ba hasa’e nível temperatura”, nia esplika.
Tuir dirijente, durante ezisténsia movimentu ne’e mak halo atividade anuál sira hanesan formasaun Laudato Si’ ne’ebé sentraliu ba diskusaun, advokasia, reza hamutuk no konferénsia, inklui diálogu komunitáriu ho objetivo hodi bele dezenvolve joven sira-nia komprensaun no eduka komunidade kona-ba mudansa klimátika.
“Diálogu ne’e ita haree liu ba impaktu husi mudansa klimátika, oinsá mak ita bele hasa’e komunidade nia konxiénsia no oinsá mak bele halo adaptasaun ba iha klima”, nia esplika.
Iha fatin hanesan, Rafaela Sarmento, reprezentante husi Movimentu Franciscana, sente haksolok, tanba bele hola parte iha Laudatu Si’ Movement Timor-Leste atu bele aprende kona-ba oinsá atu hadomi ambiente hodi kontribui ba kombate mudansa klimátika.
Laudato Si’ mak karta ensíklika (dokumentu ofisiál) ne’ebé Papa Francisco publika iha 2015. Iha karta ida ne’e, pontífise bolu atensaun ba hothotu kuidadu planeta hanesan “uma komún” ba ema hotu.
Iha dokumentu ne’e alerta katak mundu ohin loron enfrenta krize ambientál, inklui akesimentu globál (nível temperatura aumenta), poluisaun, destruisaun natureza no rekursu sira ne’ebé hahú menus ba beibeik.
Papa Francisco husik hela mensajen ba Governu, empreza, komunidade no ba ema ida-idak atu asume responsabilidade hodi proteje meiu ambiente.
Iha dokumentu ne’e Santo Padre fó hanoin katak ema kbi’it laek (ki’ak) mak dala barak liu afetadu ba mudansa klimátika, tanba ne’e husu atu tau importánsia ba justisa ambientál. Iha dokumentu Laudato Si’ ne’e, Papa Francisco bolu atensaun ba ema hotu atu iha sentidu “konversaun ekolójika”, signifika muda ábitu konsumu, hadomi natureza no hadi’a relasaun armónia ho Maromak, ho belun sira no planeta.
Objetivu prinsipál husi ensíklika ne’e mak atu konsientiza no motiva asaun konkreta hodi proteje (salva) planeta no garante futuru sustentável ba jerasaun sira tuir mai.
Notísia relasionada: “Agradese Prezidente Ramos-Horta bele lori ha’u hasoru Papa Leão XIV”
Jornalista: Ivonia Silva
Editora: Isaura Lemos de Deus
