DILI, 11 Dezembru 2025 (TATOLI)—Servisu Rejistrasaun no Verifikasaun Emprezariál, Institutu Públiku (SERVE, I.P), hahú husi Janeiru to’o Dezembru, ezekuta Orsamentu Jerál Estadu (OJE) 2025 atinje ona 83,6%.
Diretór Ezekutivu SERVE, I.P, Fausto Dias, hateten Orsamentu Jerál Estadu (OJE) 2025 ne’e SERVE ezekuta ona 83,6% ne’ebé kompostu husi kategória saláriu vensimentu no bens servisu.
“Orsamentu ne’ebé aloka ba SERVE ho fahe de’it ba saláriu vensimentu millaun $1,8 no bens servisu rihun $319, maibé ita laiha kapitál menórm tranferénsia públika no kapitál dezenvolvimentu,” Diretór Ezekutivu ne’e informa ba jornalista sira iha nia kna’ar fatin, ohin.
Dalaruma husi ezekusaun sira-ne’e hotu sempre mosu dezafiu hanesan edifísiu ladun permite ba atendementu no presiza kapasita rekursu umanu, tanba bainhira hakara instituisaun ne’e atu had’ia melloramentu atendementu ne’ebé di’ak presiza envolve mós kapitál dezenvolvimentu iha OJE.
“Maibé ami fiar katak iha fulan-Dezembru hahú husi loron 15 ba leten bele halo pagamentu saláriu vensimentu no pagamentu invoice ba edifísiu ne’ebé SERVE aluga hela iha sukursál munisípiu sira, entaun ha’u fiar katak la atinje tuir meta 100% maibé ita bele atinje 90% liu,” nia esplika.
Ho nune’e, iha Orsamentu Jerál Estadu tinan 2026, sira submete proposta ba kapitál menór no hetan aprovasaun husi Parlamentu Nasionál, maske ho montante ne’ebé kiik ho osan rihun $25, enkuantu kona-ba kapitál dezenvolvimentu ne’e sira submete ona proposta ida ba KAFI hodi hadi’a edifísiu sentrál SERVE, I.P nian, tanba udan mai bele fó impaktu bee tama ba parte balkaun ne’ebé rai arkivu dokumentu importante sira.
“Ami sei lori proposta detalladu ida ba KAFI no porposta ne’e sei perkore iha OJE 2027 nian, tanba ita tama ona ba membru ASEAN presiza hadi’a infraestrutura atu emprezáriu sira husi ASEAN bele mai halo investimentu iha ita-nia rain,” nia hateten.
Enkuantu, iha 2026, Parlamentu Nasionál aprova osan ho montante millaun $1.571 ba SERVE, I.P, kompostu husi saláriu vensimentu miliaun $1.226, bens servisu rihun $319 no kapitál menor rihun $25.
Jornalista : Alexandra da Costa
Editór : Cancio Ximenes
