Governu sei realiza auditória ba I.P ne’ebé la selu enérjia elétrika millaun $28
DILI, 17 Dezembru 2025 (TATOLI)—Governu liuhusi Ministériu Finansa sei halo auditória ba Instituisaun Públika sira-ne’ebé la selu dívida pagamentu enérjia elétrika husi Eletrisidade Timor-Leste (EDTL) kuaze millaun $28.
Kestaun ne’e aprezenta hamutuk husi Ministra Finansa, Santina Cardoso no Ministru Obra Públikas, Samuel Marçal, no hetan aprova husi Konsellu Ministru bainhira hala’o sorumutu iha Palásiu Governu, Dili, kuarta ne’e.
Tuir komunikadu imprensa ne’ebé Agência Tatoli asesu katak realizasaun auditória ida ba dívida instituisaun públikas nian ba Eletrisidade Timor-Leste, E.P. (EDTL), no orienta pagamentu parsiál ho montante validadu, hanesan prevee ona iha Orsamentu Jerál Estadu ba tinan 2025.
Desizaun ne’e konsidera ezisténsia husi dívida ne’ebé akumulada kona-ba fornesimentu enerjia elétrika, ne’ebé kalkula kuaze millaun $28, fó impaktu ba sustentabilidade finanseira no kapasidade operasionál husi EDTL, situasaun ne’ebé destaka mós iha relatóriu kámara konta nian.
Aleinde rezolusaun Governu ne’e determina katak Ministériu Finansa atu realiza auditória ida-ne’ebé detallada hodi determina montante loloos neʼebé tenke selu husi entidade ida-idak, prevee mós pagamentu, nafatin iha tinan 2025, husi millaun $18, ne’ebé inklui ona iha Orsamentu Jerál Estadu nian, nune’e mós definisaun husi planu fazeadu ida ba likidasaun husi valór restu ne’e iha tinan sira tuir mai.
Enkuantu medida ne’e mós estabelese obrigatoriedade ba instituisaun públika sira atu aloka didi’ak despeza sira-neʼebé relasiona ho fornesimentu eletrisidade iha sira-nia orsamentu, atu nune’e bele evita akumulasaun dívidas foun no garante sustentabilidade ba servisus ne’ebé presta hosi EDTL.
Jornalista : Alexandra da Costa
Editór : Cancio Ximenes
