SEFOPE-Família matebian simu traballadór timoroan Noel dos Santos nia mate-isin
DILI, 17 Dezembru 2025 (TATOLI)—Governu liuhusi Sekretária Estadu Formasaun Profisionál no Empregu (SEFOPE) hamutuk ho família matebian, simu Noel dos Santos ninia mate-isin ne’ebé tara-an iha Austrália iha 27 Novembru 2025, iha aeroportu Komoro ne’ebé transfere husi Austrália mai Timor-Leste.
Xefe Gabinete SEFOPE, Jacinto Dias Ribeiro, hateten Governu liuhusi Sekretáriu Estadu Formasaun Profesionál no Empregu (SEFOPE) sente triste ba traballadór timoroan ho naran Noel dos Santos Vicente ne’ebé lakon vida iha Austrália, tanba ne’e sira hato’o sentidu kondelénsia ba família maktoban.
“Maske iha tinan 2022, ita hamutuk ho nia iha fatin ida-ne’e hameno ho liafuan katak ba ho Maromak no servisu tenke kuidadu an depois fila mai ho ita, maibé ohin nia mai ho novidade oin seluk no imajen ne’ebé tristeza ba família no Estadu,” Xefe Gabinete ne’e hateten iha presta omenajen ne’ebé hala’o iha aeroportu Komoro, ohin.
Nia dehan, Estadu ho Governu iha nia programa oinsá atu haruka timoroan ba servisu iha rai-li’ur, joven sira ba servisu iha Austrália hodi aprende buat balun iha ne’eba, atu fila mai hodi dezenvolve Timor-Leste ho matenek ne’ebé hetan iha Austrália.
“Maibé, realidade moruk nia hatudu mai Governu liuhusi SEFOPE ho família ho tristeza, tanba ne’e SEFOPE sei kolabora ho família hodi hare’e prosesu funebre,” nia hateten.
Aleinde ne’e, nia afirma situasaun ida-ne’e nu’udar kazu, nune’e parte polísia Austrália halo prosesu investigasaun no sei entrega rezultadu diretamente ba família, SEFOPE fasilita prosesu tranferénsia no entrega mate-isin ba família.
Iha fatin hanesan, reprezentante família matebian, José Pereira Vicente, hato’o agardesementu ba Governu liuhusi SEFOPE ho família Austrália tanba bele haloot matebian ho di’ak.
“Família matebian nafatin fuan boot hodi simu realidade moruk ida tanba lakon ona oan mane ida-ne’ebé hakotu nia vida bainhira hala’o servisu iha Austrália,” nia hateten.
Enkuantu matebian ho naran Noel dos Santos Vicente, moris iha Dili iha 05 Maiu 1999, oan husi Gil Ruano dos Santos no Imaculada Santos Vicente. Maktoban Noel ho Naran estimadu “Santos” no nia iha maun alin hamutuk na’in lima (5) kompostu husi fero rua (2) no mane na’in-haat (4).
Maktoban Noel dos Santos Vicente, hahu Envolve an iha Programa PALM iha tinan 2020 to’o 02 Novembru 2022, hetan kontratu husi empreza Australian Blackpaker Central hodi ba Servisu iha Robinvale Victoria Austrália, durante fulan Sia (9).
Jornalista : Alexandra da Costa
Editõr : Cancio Ximenes
