MOP ezekuta 85% husi OJE 2025
DILI, 18 Dezembru 2025 (TATOLI)-Ministériu Obra Públika (MOP), hahú husi kaneiru to’o Dezembru 2025 ne’e, ezekuta ona Orsamentu Jerál Estadu 2025 atinje ona 85%.
Ministru Obra Públika, Samuel Marçal, hateten ezekusaun Orsamentu Jerál Estadu (OJE) 2025 ba lina ministeriál iha millaun $200-resin ne’ebé daudaun ne’e ezekuta ona 85%, ne’ebé kompostu husi kapitál dezenvolvimentu 75% ne’é uza hodi halo pagamentu ba projetu infraetrutura sira iha territóriu nasionál no fiar katak iha loron hira tan bele atinje 85%.
“Entaun ita hein katak ho aselerasaun pagamentu husi saláriu vensimentu nian nune’e ha’u fiar katak semana rua antes taka orsamentu ami bele atinje to’o 90% liu,” Ministru Samuel informa ba Agência Tatoli hafoin observa servisu iha rotunda BJ.Habibie, Bidau.
Governante ne’e afirma maske durante ezekusaun ne’e sira sempre hasoru dezafiu oioin hanesan mudansa klimátiku, problema sosiál iha terenu, problema tékniku balun kona-ba lei no prosesu sistema nian, maibé ne’e la signifika katak atu halo impedementu ba dezempenu servisu tamba buat hotu depende ba ida-idak nia vontade servisu.
“Ita komprende katak ita iha problema barak tamba ne’e servisu labele hein oras fila uma, entaun se habesan ne’e ita-nia ezekusaun labele la’o ho di’ak. Maske durante ne’e sura servisu laharee ba oras ho vontade ne’ebé boot tebes maibé ha’u esforsu haka’as nafatin sira atu hala’o sevisu ho di’ak no profisionál,” nia dehan.
Aleinde ne’e, nia apela ba funsionáriu ne’ebé servisu iha Ministériu Obra Públika ne’e la’ós mai atu buka riku maibé mai atu hadi’a ho vizaun no misaun ida ba dezenvolvimentu nasaun ida-ne’e nian, tanba bainhira hakarak nasaun ne’e dezenvolvidu laiha dalan seluk mak tenke servisu maka’as.
“Dezenvolvimentu nasaun la’ós de’it Governu mak tenke esforsu maibé iha mós kontribuisaun husi komunidade sira-ne’ebé oferese sira-nia rai, uma no kintál ba Governu hodi halo dezenvolvimentu insfraestrutura liuliu hanesan, estrada no ponte,” nia dehan.
Enkuantu Orsamentu Jerál Estadu (OJE) 2026 ba Ministériu Obra Públika hamutuk $237.108.892, kompostu husi saláriu no vensimentu $7.354.614, bens servisu $17.274.303, transferénsia públika $129.918.321, kapitál menor $5.250.000 no kapitál dezenvolvimentu $77.311.654.
Jornalista : Alexandra da Costa
Editór : Cancio Ximenes
