DILI, 18 Dezembru 2025 (TATOLI)—Prezidente Repúblika, José Ramos-Horta, kinta ne’e, inaugura empreza konsórsiu Diogo Moto Forte, Lda, ne’ebé sai autorizadór no Importadór ofisiál Motorizada ho marka Honda iha Timor-Leste ne’ebé lokaliza iha Kolmera.
Prezidente Ramos-Horta hateten ninia prezensa iha serimónia inagurasaun ne’e tanba iha vida juventude, iha esperénsia sempre lori motorizada ho marka Honda durante servisu iha sentru informasaun turízmu iha Governu Timor-Português antes tinan 1974.
“Ida-ne’e maka ha’u nia primeiravés partisipa iha eventu komérsiu ne’e. Ne’e tanba joven ida husi Timor-Leste hakarak faan motor liuhusi distributória sira ba illa sira Pasífiku nian. Karik sira-nia negósiu ne’e susesu, sira mós hakarak loke fábrika motor iha Timor Leste,” Prezidente Ramos-Horta hateten ba jornalista sira iha Kolmera, ohin.
Prezidente mós rekoñese kualidade aas husi motor Honda, hodi nota katak nia sa’e ona ida durante era koloniál portugés.
Iha fatin hanesan, Jorge S. Luis, reprezentante husi dealer Honda Diogo Moto Forte no Ahass, afirma katak objetivu prinsipál husi loke dealer ne’e atu fornese motor Honda ne’ebé baratu no ho kualidade ba públiku.
“Primeiru, Honda hakarak oferese presu ne’ebé ki’ik liu no kualidade ne’ebé di’ak-liu, ne’e signifika katak motor sira-ne’e tenke jenuínu, servisu ba motor tenke tuir padraun internasionál Honda nian. Segundu, atu kria kampu traballu ba rezidente lokál sira,” nia dehan.
Nia hatutan, dealer Honda ne’e mós iha planu atu habelar nia prezensa iha munisípiu sira iha Timor-Leste laran tomak.
“Sei loke dealer Honda iha munisípiu hotu-hotu, no ami mós sei halo Timor-Leste sai hanesan sentru ba Rejiaun Pasífiku Súl. Ami sei hatama motorizada sira mai iha Timor Leste no depois esporta ba Papua Nova Guiné, Fiji no Vanuatu,” nia hateten.
Nia hatutan, karik motor Honda iha demanda maka’as mak kompañia iha planu atu loke fábrika Honda diretamente iha Timor-Leste, ne’ebé bele fó benefísiu mós ba Timor-Leste.
“No mós ba planu sira iha futuru, ami mós sei halo koordenasaun ho Banku BNCTL, ami-nia banku dezenvolvimentu foun no banku sira seluk, inklui kooperativa poupansa no empréstimu hanesan Kaebauk no Moris Rasik, atu sira-ne’ebé iha ami-nia komunidade ne’ebé ladún iha sorte no labele sosa motor bele koordena ho ami liuhusi sira, nune’e ami bele fasilita prosesu ne’e,” nia hateten.
Empreza referidu sei kontinua servisu hamutuk ho empreza prinsipál HONDA iha Indonézia, atu fortifika liutan kolaborasaun no loke fábrika motorizada Honda iha Timor-Leste.
Inisiativa ne’e permite hafasíl liutan populasaun Timor sira atu hetan produtu Motorizada Honda no pesa sira ho folin razoável iha Timor-Leste.
Jornalista : Hortencio Sanchez
Editór : Cancio Ximenes
