VIKEKE, 26 Dezembru 2025 (TATOLI)–Komandante Autoridade Protesaun Sivíl (APC-sigla portugeza) Munisípiu Vikeke, Cirílio Gomes informa akontesimentu udan boot iha fulan-Dezembru ne’e hamosu lalubur (inundasaun) afeta uma-kain 24 husi Suku Bahalaraua’in no Suku Uma-Ua’in Kraik, Postu Administrativu Vikeke Vila.
“Udan boot iha 22 Dezembru 2025, hamosu inundasaun hodi afeta ita-nia komunidade uma-kain 100, maibé ita-nia ekipa APC bá halo ona verifikasaun komunidade nia uma ne’ebé bee tama hamutuk 24 de’it,” Cirílio Gomes ba TATOLI iha Postu Vikeke Vila, Sesta ne’e.
Nia klarifika, akontesimentu inundasaun ne’e la rezulta estraga sasán uma laran no uma monu.
“Inundasaun ne’e la afeta ba uma monu no estraga sasán uma laran ruma. Ita apoia ona ai-han emerjénsia ba komunidade afetada kompostu husi foos, supermie, mina, biskuit, sardina, kafé, masi-midar, susu-been no seluk tan,” Cirílio haktuir.
Nia solisita komunidade atu fó-atensaun ba dezastre naturál tanba agora tempu udan, tenke sees-aan husi fatin risku sira atu labele sai vítima.
Nune’e mós, Cirílio tenik, iha 25 Dezembru kalan akontese udan afeta tan komunidade nia uma iha mota sori parte merkadu antiga Vikeke Vila nian, maibé seidauk identifikadu.
“Agora daudaun ami atu hakat bá mota sorin hodi halo verifikasaun. Depoizde verifikasaun hotu, ita sei distribui pakote emerjénsia,” nia informa.
Jornalista: Vitorino Lopes da Costa
Editór: Xisto Freitas da Piedade
