Prezidente Ramos-Horta klarifika vizita NTT ne’e viajen privadu
DILI, 29 Dezembru 2025 (TATOLI)—Prezidente Repúblika, José Ramos-Horta, segunda ne’e, klarifika ninia vizita ba Nusa Tengara Timur (NTT), Soe, Indonézia, iha loron 25 fulan-Dezembru tinan 2025 ne’e nu’udar viajen privadu.
“Viajen ne’e la utiliza karreta ofisiál, laiha ema ida hetan osan perdiem, seguransa mós la hetan osan perdiem,” Prezidente Ramos-Horta hateten ba jornalista sira iha Palásiu Prezidensiál Nicolau Lobato, Bairru Pite.
Nia dehan, viajen ne’e iha ema balun utiliza karreta Estadu, tenke responsabiliza tanba nia rasik hasai orden laiha ema ida utiliza karreta Estadu durante vizita ne’e.
“Se mak lori karreta Estadu nia mak responsabiliza, ha’u hasai orden ezekutivu ida katak laiha karreta Estadu no konvustivel Estadu iha viajen ne’e,” Ramos-Horta dehan.
Ramos-Horta hato’o pozisaun ne’e hodi responde ba públiku ninia preokupasaun iha rede sosiál kona-ba Prezidente nia viajen ba NTT, Soe, Indonézia foin lalais ne’e.
Jornalista : Hortencio Sanchez
Editór : Cancio Ximenes
