DILI, 05 Janeiru 2025 (TATOLI)—Primeiru-Ministru, Kay Rala Xanana Gusmão, husu ba ajente Estadu sira iha instituisaun Eastadu atu hadi’a jestaun sistema administrasaun Estadu no kompromisu responsabilidade servisu iha tinan 2026 ne’e.
Primeiru-Ministru, Kay Rala Xanana Gusmão, hateten funsionáriu públiku sira tenke hanoin saida mak halo tiha ona no halo di’ak ka lae, no se halo buat ruma ladun di’ak karik presiza kurije erru tanba ida-ne’e mak responsabilidade durante tinan rua ho balun.
“Bainhira ita ko’alia hela de’it maibé jestaun iha kraik la la’o di’ak hanesan de’it. Ita halo auditória ida ba iha fatin hotu-hotu no deteta problema boot-liu mak arkivu laiha atu bele dokumenta ita-nia faillansu ne’e iha ne’ebé no ita-nia halo di’ak ne’e iha ne’ebé,” Xefe Governu hateten iha ninia diskursu iha isar bandeira semana dahuluk iha Palásiu Governu, ohin.
Xefe Governu ne’e konsidera tinan 2026 importante tebes atu kurije iha sistema administrasaun no kurije funsionáriu sira-ne’ebé la obedese ba responsabilidade hodi kontra regra servisu katak mai tarde no fila sedu.
“Saida mak ita tau iha orsamentu menus ne’e tanba ita laiha planu, nune’e aplika ba ezekusaun ladun di’a. Iha fatin balun atinje 75%, iha seluk fali 50%-liu, entaun tinan ida-ne’e ita tenke kurije,” nia esplika.
Nia hatutan, funsionáriu sira mai atu serví la’ós mai atu hetan netik osan haruka oan sira ba eskola, edukasaun ladun forte, rekursu graduadu barak maibé la serve servisu, ho ida ne’e mak Timor-Leste hakarak hari’i mentalidade sosiedade nian, eduka ho matenek hodi bele ba serbí rai ida-ne’e la’ós mai hetan servisu de’it.
Iha 2026 ne’e, presiza halo mudansa iha atitude no kompromisu, nune’e povu hotu-hotu bele sente katak jerasaun sira-ne’ebé sai matenek no iha ona servisu hanoin ba rai ne’e la’ós hanoin ba sira-nia an rasik, entaun povu sei respeita no hadomi ita bainhira ema ida obedese servisu ba povu.
“Tamba povu fiar katak ita hetan tiha ukun-an no nia jerasaun sira-ne’ebé ba servisu hanoin netik sira-nia moris no rai ida ne’ebé ema rihun ba rihun luta hodi fó sira-nia moris ba ukun rasik-an,” nia dehan.
Ne’eduni, nia husu ba ema hotu nia responsabilidade no iha administrasaun tenke servisu ho di’ak no ho hanoin ida katak atu serbí rai ida-ne’e no povu, la’ós halimar ho demokrásia katak bainhira luta servisu di’ak ba povu buat ne’ebé akontese iha ne’e labele liga ba mundu, husik ba timor-oan ho timor-oan imak resolve, tanba laiha inimigu no laiha aliadu maibé hotu-hotu mesak belun.
“Ha’u husu imi hotu nia kompromisu, iha fulan tolu mak haree ba katak laiha mudansa ba hahalok iha servisu laran, ita lalika halo tan ona seremónia isar ona bandeira tanba ita lahatene servisu. Bainhira imi liberta povu husi ki’ak mak imi mós sei sai erói,” nia apela.
Jornalista : Alexandra da Costa
Editór : Cancio Ximenes
