PPN-Embaixadór Reinu Unidu diskute kooperasaun iha demokrasia no eleisaun
DILI, 30 Setembru 2026 (TATOLI) – Prezidente Parlamentu Nasionál (PPN), Maria Fernanda Lay, simu audiénsia husi Embaixadór Reinu Unidu bá Indonézia no Embaixadór Naun-Rezidente ba Timor-Leste, Dominic James Robert Jermey, hodi diskute kona-ba kooperasaun iha área demokrasia no eleisaun.
Reuniaun ne’e hala’o iha sala konferiénsia Parlamentu atu haforsa liután serbisu kooperasaun entre parte rua, espesialmente iha área demokrasia no eleisaun, ne’ebé presiza partilla informasaun ba malu hodi haree ba preparasaun sira husi perspetiva Parlamentu Nasionál nian atu hasoru Eleisaun Prezidensiál no Parlamentár ne’ebé sei akontese iha tinan 2027 no 2028 mai.
Maria Fernanda Lay hato’o katak ho alterasaun ba lei eleitorál nasionál ne’ebé vigora agora presiza aumenta preparasaun téknika balun ho di’ak liután, hodi akomoda sidadaun hotu atu partisipa másima iha eventu demokratiku iha rai-laran no iha diáspora.
Nia koloka mudansa teknolojia Intelijénsia Artifisiál (AI) ne’ebé iha agora bele influensia demokrasia rasik. Hodi subliña importante tebes atu hala’o edukasaun sívika ba komunidade hodi hasa’e koñesimentu. No ba utilizadór ne’ebé konsumu informasaun tenke análize ho prudénsia, atu ajuda kria estabilidade iha komunidade no nasaun laran.
Aleinde ne’e, parte rua mós ko’alia kona-ba serbisu no ezisténsia traballadór timoroan sira iha Reinu Unidu.
Fernanda Lay hato’o agradesimentu ba Estadu Reinu Unidu nian ne’ebé simu ona traballadór timoroan sira atu serbisu iha ne’ebá. Tuir nia, ida-ne’e fó impaktu pozitivu tebes ba ekonomia Timor-Leste, liuliu ba sira-nia família nune’e mós ba Reinu Unidu.
Nia mós husu atu liuhusi kolaborasaun serbisu, diálogu no diskusaun entre Parlamentu ho Parlamentu, Governu ho Governu bele fó solusaun apropriada ba traballadór sira ne’ebé iha problema hanesan sira ne’ebé seidauk hetan autorizasaun rezidénsia, bazeia ba lei no akordu entre parte rua, atu fó impaktu ne’ebé di’ak liután iha futuru.
Jornalista: Nelson de Sousa
Editora: Maria Auxiliadora
