Ezekusaun orsamentu Parlamentu Nasionál to’o Setembru atinje 51%
DILI, 01 Outubru 2026 (TATOLI)-Parlamentu Nasionál ezekuta ona $9.792.363,13 ka 51% husi Orsamentu Jerál Estadu (OJE) 2026 ho montante inisiál $19.073.404, to’o iha fulan-Setembru ne’e.
Tuir relatóriu ezekusaun orsamentál Parlamentu, kategoria saláriu no vensimentu ne’ebé hetan alokasaun $11.217.005, ne’ebé destina ba pagamentu saláriu no vensimentu ba deputadu, funsionáriu permanente, kontratadu, asesór nasionál no internasionál, inklui subsídiu no pagamentu ba oras estraordináriu tuir nesesidade institusionál atinje $7.128.469.61 ka korresponde 64%.
Iha kategoria bens no serbisu aloka $6.276.343, depoizde hetan alterasaun orsamentál ho montante $34.045. Alterasaun ida-ne’e mai husi realokasaun orsamentu husi kategoria kapitál menór ba kategoria bens no serbisu ninia ezekusaun atinje $1.761.117,60 (28%) husi orsamentu finál. Aleinde ezekusaun atuál, inklui mós obrigasaun ho kompromisu ho totál $3.866.499.
“Situasaun ida-ne’e hatudu katak parte signifikativu husi orsamentu kategoria bens no serbisu seidauk sai gastu efetivu, maibé iha ona obrigasaun no kompromisu neʼebé bele kontribui ba ezekusaun iha períodu tuirmai, balansu ne’ebé iha ho totál $2.409.844”, dokumentu ne’e dehan.
Iha verba transferénsia públika ho montante $955.180, ezekuta ona $902.775,92 (95%) husi orsamentu finál.
Ezekusaun boot liu mai husi transferénsia ba subvensaun bankada parlamentár, ne’ebé atinje 100% nia ezekusaun. Aleinde ne’e, iha mós pagamentu ba auxíliu ba lutu/mate no transferénsia internasionál ka kuota.
Ba kapitál menór iha dotasaun inisiál $658.921, depoizde alterasaun orsamentál ho montante $34.045.45, orsamentu final sai $624.875.55, maibé seidauk iha ezekusaun efetiva ba kategoria ida-ne’e no nia taxa ezekusaun 0%.
Maibé, iha ona $46.996 iha obrigasaun no $571.259,55 iha kompromisu, hamutuk $618.255,55, ne’ebé reprezenta 99% husi orsamentu finál.
Balansu ne’ebé iha ho totál $6.620 no situasaun ida-ne’e hatudu katak, maski ezekusaun finanseira seidauk rejista, prosesu implementasaun ba akizsiaun bens kapitál sira la’o ona liuhusi etapa obrigasaun no kompromisu, inklui prosesu aprovizionamentu.
Orsamentu ne’e finansia ba programa haat hanesan fomenta relasaun internasionál no kooperasaun Parlamentu, garante ezersísiu funsaun jeoinstitusionál Parlamentu, promove kultura abertura no transparénsia iha Parlamentu, funsionamentu no dezenvolvimentu insituisionál.
Notísia relevante: Parlamentu aprova orsamentu privativu millaun $19,240 ba tinan 2027
Jornalista: Nelson de Sousa
Editora: Maria Auxiliadora
