Deputadu husu ME kompleta meza no kadeira ba eskola sira iha Manatutu
DILI, 01 Outubru 2026 (TATOLI) – Deputadu husi Partidu Kongresu Nasionál Rekonstrusaun Timorense (CNRT, sigla portugés), Gabriel Soares, husu ba Ministériu Edukasaun (ME) atu kompleta meza no kadeira ba eskola balun iha Manatutu.
Vise-Prezidente Komisaun G ne’ebé trata Asuntu Edukasaun, Juventude, Desportu, Kultura no Sidadania ne’e bolu atensaun ministériu atu kompleta mobiliáriu eskolár, tanba ezame nasionál no lokál ba estudante finalista sira sei hala’o iha fulan-Outubru nia laran depois kontinua ho ezame pasajen klase.
Nia dehan katak foin lalais hala’o fiskalizasaun bá iha Eskola Kristy Gusmão iha Laleia-Manatutu, Eskola Téknika Agríkola Natarbora no eskola bázika balun iha Abatua no Eskola Bázika Filiál Abion iha parte Natarbora nian ne’ebé nesesita duni atensaun, tanba situasaun atuál ne’e falta mobiliáriu eskolár.
“Haree presiza kompleta meza no kadeira iha eskola sira hodi fasilita estudante no manorin-na’in sira halo jestaun no prepara ezame ho di’ak”, nia levanta iha uma fukun Parlamentu Nasional, ohin.
Vise-Ministru ba Asuntu Parlamentár, Adérito Hugo, rejista prokupasaun ne’e no sei envia ba ministériu tutela hodi tau atensaun.
Jornalista: Nelson de Sousa
Editora: Maria Auxiliadora
