Papa Leão XIV husu hakotu violénsia no defende Estadu direitu iha Venezuela
DILI, 05 Janeiru 2026 (TATOLI) – Amu-Papa Leão XIV husu atu povu Venezuela nia di’ak tau aas liu interese sira seluk no tau importánsia atu ultrapasa violénsia, defende Estadu direitu, no respeita sidadaun hothotu nia direitu umanu no sivíl.
Papa Leão XIV halo apelu ne’e durante orasaun Angelus iha domingu, 04 Janeiru 2026, iha Prasa Saun Pedro, iha Vatikanu, relasiona ho situasaun polítika no seguransa iha Venezuela, hafoin forsa sira Estadu Unidu nian kaer Prezidente Nicolás Maduro, iha Karakas, iha loron sábadu, no lori nia bá Nova Iorke hodi tuir prosesu legál sira.
“Povu doben Venezuela nia di’ak tenke prevalese liu konsiderasaun sira seluk hotu no lori ita atu ultrapasa violénsia no buka tuir dalan justisa no dame nian”, Papa Leão XIV hateten iha nia diskursu, hanesan sita husi Vatican News.
Nia mós subliña katak nesesidade atu proteje nasaun nia soberania, asegura Estadu direitu ne’ebé konsagra ona iha konstituisaun, no respeita direitu umanu no sivíl ema hotu-hotu nian lahó esesaun.
Papa husu ba parte hotu atu serbisu hamutuk hodi harii futuru ida pasífiku, estavel, no armoniozu ba Venezuela, ho atensaun espesiál ba ema ki’ak sira ne’ebé afetadu liuhusi situasaun ekonómika ne’ebé difisil.
Ko’alia iha ema rihun ba rihun ne’ebé halibur iha Prasa Saun Pedro nia oin, Papa Leão XIV konvida sarani tomak atu reza ba povu Venezuela no garante katak nia rasik sei kontinua halo orasaun iha nia orasaun rasik.
Iha biban ne’e, Papa mós fiar no lori povu tomak Venezuelanu ba iha intersesaun Na’in-Feto Coromoto, São José Gregório Hernández, no Santa Carmen Rendiles, ne’ebé sai padroeiru ba Venezuela nian.
Hodi hakotu orasaun Angelus, Amu-Papa Leão XIV husu ba sarani sira atu fiél nafatin no depende ba Maromak nu’udar hun ba dame loloos. “Mai ita kontinua fiar iha Maromak dame nian. Mai ita reza no hamriik iha solidariedade ho povu ne’ebé sofre tanba funu”, nia subliña.
Lembra katak, iha madrugada 03 Janeiru 2026, forsa espesiál Estadu Unidu nian tuir informasaun tama iha Karakas no hala’o operasaun sira iha área militár oioin iha kapitál. Durante operasaun, Nicolás Maduro ho nia feen, Cilia Flores, hetan kaer iha sira-nia rezidénsia, hafoin lori bá Nova Iorke no hetan akuzasaun ba krime grave oioin.
Hatán ba akontesimentu ne’e, konferénsia Bispu sira Venezuela nian fó sai ona komunikadu ofisiál ida iha domingu ne’ebé hatudu igreja nia solidariedade ba venezuelanu tomak. “Iha naroman husi eventu sira ne’ebé ita-nia rain esperiénsia daudaun, mai ita husu ba Na’i atu haraik serenidade, matenek no forsa ba ema venezuelanu hotu-hotu”, bispu sira afirma.
Bispu sira mós manifesta sira-nia solidariedade ba kanek sira no família sira ne’ebé lakon ema ne’ebé sira hadomi, no husu ba sarani sira atu kontinua reza ba unidade nasionál. “Ami hamriik iha solidariedade ho kanek sira no ho família sira husi matebian sira. Mai ita persevera hodi reza ba unidade husi ita-nia povu”, komunikadu ne’e afirma.
Konferénsia Bispu Venezuela nian mós repete ninia rejeisaun ba forma hothotu violénsia nian no husu atu desizaun hotu-hotu ne’ebé foti tenke iha duni interese di’ak liu ba povu.
“Ami bolu ba Maromak nia povu atu moris tuir esperansa maka’as no orasaun ba dame iha ami-nia fuan no sosiedade. Ami rejeita forma hotu husi violénsia, no hein katak desizaun sira ne’ebé foti sei sai nafatin ba povu Venezuela nia di’ak”, konklui.
Notísia relasionada: Prezidente Venezuela to’o ona iha Nova Iorke hafoin kaptura hosi EUA
Fonte: Vatican News
