BOBONARU, 08 Janeiru 2026 (TATOLI) – Prezidente Autoridade Protesaun Sivíl (APC, sigla portugés), Jesuíno de Matos Carvalho, husu ba komunidade atu hasa’e konxiénsia ambientál nu’udar medida prekausaun hasoru dezastre naturál hodi evita inundasaun ho eskala boot.
Jesuíno de Matos hateten iha ámbitu entrega pakote emerjénsia, ne’ebé kompostu husi ai-han no la’ós ai-han ba vitíma inundasaun hamutuk uma-kain 51, iha suku Aidabaleten, postu administrativu Atabae, hodi responde ba sira-nia nesesidade ba loron balun nian.
Pakote emerjénsia ne’e fahe husi Autóridade Protesaun Sivíl (APC, sigla portugés) no Diresaun Servisu Munisipál Protesaun Sivíl Risku Jestaun Dezastre Munisípiu Bobonaru.
Dirijente APC ne’e subliña katak kauza prinsipál husi inundasaun maka estragu ambientál, liuliu tesi ai arbiru iha área mota-ninin no foho-lolon sira, tanba ne’e nia husu ba rezidente sira iha área risku atu kuda ai-horis hodi proteje rai, nune’e labele akontese kalamidade iha tempu badak no ba futuru.
Notisia relevante: Inundasaun kontinua afeta komunidade iha aldeia Miguir
“Ha’u hateten buat ida simples de’it, mundu ne’e tuan ona ba ita. Se ita moris hakarak soe de’it, sunu de’it, taa de’it, ne’e la’ós ona tempu. Ai-horis sira ne’e mós presiza atu kuidadu, se ita hanoin tesi no estraga de’it, ninia konsekuénsia mak mai fali ita”, nia hateten iha sede suku Aidabaleten, ohin.
Administradór Postu Administrativu Atabae, Pedro Laco Buti, agradese ba Governu tanba la husik nia populasaun mesak hasoru situasaun difísil ne’e.
Nia argumenta katak inundasaun ne’e akontese tanba kauza husi konstrusaun ponte ne’ebé Estadu harii ho espasu ne’ebé kloot.
“Ita haree liu ba kondisaun fízika ba iha ponte, tanba realidade akontese udan tun, ai sira ne’ebé husi foho ne’e mai taka tia bee-dala. Bee dalan laiha tenke sa’e fali ba komunidade sira. Ida-ne’e mak ita presiza haree hodi propoin ba dezenvolvimentu futuru mai, tanba ita lakohi tinan-tinan akontese inundasaun iha fatin ne’ebé hanesan”, afirma.
Sekretáriu Autoridade Munisípiu Bobonaru ba Asuntu Sosiál, Júlio Carvalho Caero, konfirma katak nia parte halo ona koordenasaun ho Diresaun Obra Públika Munisípiu Bobonaru hodi halo filafali levantamentu dadus iha área balun ne’ebé risku ba inundasaun.
Atu preve dezastre naturál iha tempu udan ne’ebé mai ho volume boot, Júlio argumenta katak líder komunitáriu sira tenke hola papél limportante hodi organiza komunidade halo limpeza iha uma ninin no valeta laran.
Lembra karak inundasaun ne’e akontese iha loron 05 no 06 Janeiru ne’ebé afeta ba komunidade nia uma, plantasaun, inklui danifika uma sira iha minimerkadu Miguir.
Notísia relevante: MOP presiza hasai sendimentasaun iha ponte Miguir
Jornalista: Sergio da Cruz
Editora: Maria Auxiliadora
