BOBONARU, 20 Fevereiru 2026 (TATOLI) – Prezidente Autoridade Munisípiu Bobonaru, Paulo Moniz Maia, organiza funsionáriu sira halo limpeza jerál iha espasu públiku iha Maliana Vila.
Atividade limpeza iha spasu públiku iha Maliana tama ona iha oráriu fiksu iha kada loron sesta-feira hodi garante ambiente moos no saudavel ba komunidade.
“Baibain ne’e iha ona ami-nia oráriu fiksu. Kada sesta-feira, funsionáriu hotu-hotu tenke halo limpeza hahu tuku 08:00 to’o tuku 10:00. Depois ida-ne’e, idaidak filafali bá nia edifísiu atu kontinua serbisu. Ami halo limpeza tanba hakarak ita-nia ambiente moos, nune’e kualker moras labele afeta ba ita-nia komunidade, ita-nia povu saudavel ba futuru aban bainrua”, Paulo Moniz Maia dehan ba jornalista sira iha Zinájiu Maliana, ohin.
Notísia relevante: SMASA Bobonaru planeia prepara fatin lixu haat iha kapitál Maliana
Dirijente ne’e subliña katak limpeza la’os de’it iha estrada boot, inklui edifísiu públiku nia oin no bainhira instituisaun ruma la kumpre orden ne’ebé fó sai, autoridade sei fó sansaun tuir regulamentu ne’ebé iha.
Atu reforsa medida ne’e, autoridade munisipál prepara hela sirkulár ida atu distribui ba postu administrativu neen iha munisípiu Bobonaru to’o nivel suku.
“Ha’u hanoin ami iha reuniaun ida ho aministradór postu ho xefe suku sira, nune’e bele alerta ba povu tomak kada sesta tenke halo limpeza, tanba ita-nia ambiente moos mak moris saudavel”, dehan.
Komunidade iha Maliana Josefina de Jesus Soares apresia ho inisiativa ne’e no liuhusi atividade referida bele eduka komunidade hamoos ambiente.
Nia argumenta katak inisiativa limpeza semanál ne’e espera bele kria kultura hamoos ho responsabilidade hamutuk entre autoridade no komunidade iha Bobonaru.
“Atividade ida-ne’e motiva tebes. Ami fiar katak limpeza ida-ne’e sei kontinua, tanba Maliana hanesan kapitál munisípiu ne’ebé presiza moos atu hatudu imajen di’ak ba ema husi fatin seluk”, katak.
Hafoin limpeza, ekipa Servisu Munisipál Água, Saneamentu no Ambiente rekolla kedas lixu hodi ba tau iha lixeira iha Manapa.
Notísia relevante: APA Maliana konsensializa komunidade kona-ba limpeza no labele soe lixu arbiru
Jornalista: Sergio da Cruz
Editora: Maria Auxiliadora
