DILI, 23 Fevereiru 2026 (TATOLI)—Eskola Sekundária Jerál (ESJ) FINANTIL no Eskola Sekundáriu Jerál 04 Setembru UNAMET Balide, la realiza prosesu aprendizajen ba estudante sira tanba bee nalihun iha arredór eskola no tahu nakonu iha saladeaula.
Diretór ESJ FINANTIL, Aniceto Berlelo husu ba Ministériu Edukasaun atu rezolve urjentemente asuntu ne’e hodi normaliza fali prosesu aprendizajen ba estudante sira no hadi’a eskola hodi la akontese tan iha futuru.
Tinan-tinan bainhira udan boot, nia haktuir, eskola referida sempre mosu inundasaun, tanba laiha bee dalan atu sai, nune’e bee nalihun iha arredór eskola, tama to’o sala laran, lori tahu tama ba sala laran, estraga sasán sira hanesan livru, diploma, komputadór no seluk tan.
Nia informa eskola referida hato’o beibeik relatóriu ba Ministériu Edukasaun (ME) maibé la rezolve to’o agora.
“Tenke hadi’a urjentemente eskola ne’e tanba kuandu loron-loron mak laiha prosesu aprendizajen, estudante sira lakon oportunidade no diretu atu aprende. Tanba ne’e, husu ba Ministériu Edukasaun no Sekretaria Estadu Ensinu Sekundáriu Jerál no Tékniku Vokasionál atu rezolve no trata urjente eskola ne’e,” Aniceto Berlelo dehan ba jornalista sira iha nia kna’ar fatin, Segunda ne’e.
Nune’e mós, Diretór ESJ 04 Setembru UNAMET Balide, Sérgio da Cruz mós husu atu hadi’a infraestrutura eskola, hodi estudante sira labele sai vítima ba inundasaun.
“Tinan-tinan sempre hamosu tahu-teen iha oin, bee nalihun iha sala laran, ohin mosu filafali, nune’e ba estudante ne’ebé turnu primeiru la hetan prosesu aprendizajen ohin, tanba sala laran bee nalihun,” nia dehan.
Nia hatutan, antes ne’e eskola hato’o ona problema ne’e ba Ministériu Edukasaun maibé seidauk iha solusaun atu hadi’a.
Hatán ba problema ne’e, Diretór Nasionál Ensinu Sekundáriu Jerál, Benjamin Fernandes hateten eskola ne’ebé sempre mosu inundasaun tau ona iha planu tinan ne’e atu halo konstrusaun foun.
“Kona-ba ekipamentu sira-ne’ebé aat, Ministériu Edukasaun sei rezolve no sei distribui filafali hodi kompleta. Tanba ne’e, eskola ne’ebé sempre mosu inundasaun, dadus tama ona iha planu ba tinan ne’e hodi halo konstrusaun foun no sei foti aas liután uma nia fondasi, nune’e bee mai labele tama no nalihun iha eskola laran,” Benjamin tenik.
Nia dehan, eskola ne’ebé sempre inundasaun, tanba laiha bee dalan atu bee sulin sai, nune’e nalihun hamutuk iha arredór eskola.
“Eskola FINANTIL nia lokalizasaun ne’e iha tiha populasaun nia leet no bee tenke tama hotu fali mai eskola, tanba ne’e mak bee nalihun hela iha arredór eskola no iha sala laran. Bee nia fatin atu sai mak laiha,” Benjamin esklarese.
Jornalista: Osória Marques
Editór: Xisto Freitas da Piedade
