Papa Leão XIV hato’o kondolénsia ba vítima konflitu Médiu Oriente

DILI, 11 Marsu 2026 (TATOLI) – Amu Papa Leão XIV hato’o ninia tristeza boot ba vítima bombardeamentu barak iha konflitu ne’ebé la’o daudaun iha Médiu Oriente, liuliu ema sivíl inosente no padre katóliku ida ne’ebé mate bainhira fó tulun iha Líbanu.

Tuir Vatican News (09/03), iha deklarasaun ofisiál ne’ebé fó sai hosi Gabinete Imprensa Santa Sé, Papa Leão XIV hato’o ninia kondolénsia sinseru ba “vítima hotu-hotu hosi atentadu sira foin lalais ne’e iha Médiu Oriente, inklui ema inosente barak, labarik sira, no sira ne’ebé tulun sira.”

Komunikadu ne’e mensiona katak padre maronita Pierre El-Rahi mate iha Qlayaa, iha Líbanu, bainhira tenta atu salva sarani ida ne’ebé hetan kanek tanba atake tanke nian.

Amu-Papa hatete katak nia akompaña situasaun ne’e ho preokupasaun maka’as no reza atu hakotu ostilidade sira.

“Nia reza atu ostilidade hotu-hotu bele para lalais liután,” dehan deklarasaun ofisiál Vatikanu.

Tuir relatóriu sira hosi mídia lokál, Pe. El-Rahi, ho tinan 50, no joven balun halai ba sarani ida nia uma ne’ebé hetan tiru hosi tanke hodi ajuda vítima sira.

Maibé, bainhira sira to’o, atake daruak ida kona padre, hodi hakanek nia todan no depois mate iha ospitál.

Funu iha rejiaun obriga família barak halai sai hosi sira nia uma, enkuantu rezidente rihun sira kontinua buka seguransa iha tempu ne’ebé tauk violénsia ne’ebé aumenta no instabilidade iha rejiaun.

Papa Leão XIV husu atu hapara kedas ostilidade sira no husu ba parte hotu-hotu atu fó prioridade ba diálogu no dame hodi proteje ema sivíl sira ne’ebé vulneravel nia moris iha rejiaun ne’ebé nakonu ho konflitu. 

Jornalista : Cidalia Fátima

Editora    : Armandina Moniz