Xefe Estadu-Embaixadór EAU diskute kona-ba estabilidade rejionál
DILI, 18 Marsu 2026 (TATOLI)–Prezidente Repúblika, José Ramos-Horta, hasoru malu ho Embaixadór naun-rezidente Emiradu Árabe Unidu (EAU) ba Timor-Leste, Abdulla Salem AlDhaheri, no Konselleira husi Embaixada EAU iha Timor-Leste, Shaima Salem, hodi diskute kona-ba estabilidade rejionál.
“Ami iha enkontru ida-ne’ebé di’ak no produtivu tebes ho Prezidente Jose Ramos-Horta, ami diskute situasaun atuál iha rejiaun partikulár Iraun, situasaun Emiradu Árabe Unidu, agresaun ne’ebé hanesan ita-boot sira hatene Iraun halo atake ba Emiradu Árabe Unidu no nasaun sira seluk iha rejiaun inklui reinu Jordánia,” Embaixadór ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia dehan, EAU totalmente apresia apoiu ne’ebé simu ona husi Prezidente Ramos-Horta no Governu Timor-Leste.
“Ita hein duni katak situasaun ida-ne’e sei ramata lalais no seguransa sei fila ba normál,” nia dehan.
Daudaun ne’e, preokupasaun urjente kona-ba seguransa rejionál iha Médiu Oriente, ne’ebé Prezidente espresa ninia solidariedade ba Emiradu Árabe Unidu no nasaun afetadu seluk.
Nia hatutan, Xefe Estadu reafirma Timor-Leste nia kompromisu ba pás no hatudu ninia intensaun atu uza ninia pozisaun internasionál no ligasaun ho ninia maluk laureadu Nobel da Paz sira atu advoga ba de-eskalada no lori hikas estabilidade ba rejiaun ne’e.
Iha parte seluk, diskute mós kona-ba vizita diplomátika ne’ebé mak avansu husi doasaun signifikativa ne’ebé finansia husi EAU atu harii fasilidade akomodasaun ho kualidade modernu ba estudante feto sira.
Lokaliza iha besik Palásiu Prezidensiál, projetu ne’e sei fornese kuartu 500 ho kualidade aas no tuir planu atu ramata iha fulan-maiu 2027.
Diretór tékniku sira dadaun ne’e iha baze hodi avalia, atu garante katak projetu ne’e la’o tuir planu hodi apoia nesesidade edukasionál juventude timoroan sira.
Ba oin, parte rua esplora atu habelar kooperasaun bilaterál iha setór ekonomia, turizmu no saúde. Delegasaun espesializada ida husi EAU sei halo vizita mai Timor-Leste iha fulan-bbril atu define di’ak liután parseria sira-ne’e no identifika oportunidade foun ba investimentu.
EAU espresa sira-nia apresiasaun ba relasaun di’ak entre nasaun rua ne’e, hodi destaka kompromisu konjuntu atu hametin liután parseria ne’e iha futuru.
Jornalista : Hortencio Sanchez
Editór : Cancio Ximenes
