VIKEKE, 23 Jullu 2026 (TATOLI)—Ministériu Saúde (MS) liuhusi Vise-Ministru ba Asuntu Fortalesimentu Institusionál Saúde (VMFIS), José dos Reis Magno, ofisialmente entrega ambulánsia multifusaun ida ba Autoridade Munisípiu Vikeke hodi refrosa servisu saúde munisipál.
Iha distribuisaun ne’e, Vise-Ministru ba Fortalesimentu Institusionál Saúde (VMFIS), José dos Reis Magno, hateten karreta ambulánsia ne’ebé MS apoia ba Munisípiu Vikeke sai hanesan sistema saúde tanba fasilidade saúde tenke iha ambulánsia hodi halo transferénsia moras sira iha área rurál asesu ba fasilidade saúde.
“Husi internamentu Vikeke Vila bá Baukau distánsia dook, depoiz área jeográfika ba suku hanesan Uaimori distánsia dook. Entaun, ita presiza apoia karreta hodi fasilita servisu liuliu dezloka moras sira husi suku no fasilidade sira bá internamentu,” José dos Reis hateten ba jornalista sira iha Postu Vikeke Vila, Kinta ne’e.
Governante ne’e rekoñese katak maski MS apoia ona karreta ambulánsia foun ida ba Munisípiu Vikeke, maibé ida-ne’e seidauk sufisiente ba Munisípiu Vikeke, presiza refrosa nafatin hodi kobre área remota sira-ne’ebé dook husi vila.
“Ho apoia ida-ne’e ha’u husu ba servisu saúde munisipál no funsionáriu tenke kuidadu ambulánsia ne’ebé MS oferese hodibele fasilita ita-boot sira-nia servisu tanba ambulánsia referida multifunsaun, entaun bele apoia mós ba programa sira seluk ne’ebé relevante ba servisu saúde nian,” nia hato’o.
Iha fatin hanesan, Diretór Servisu Saúde Munisípiu Vikeke, Aljaksono S. Maia, haktuir kona-ba apoia karreta ambulánsia ida-ne’e seidauk sufisiente ba Munisípiu Vikeke tanba área luan, postu saúde hamutuk 43, sentru saúde lima (5) no internamentu ida.
“Ha’u sente karreta ambulánsia ba Munisípiu Vikeke seidauk sufisiente tanba dalaruma kazu moras grave ne’e dalaruma loron ida ema na’in-neen no lima, entaun ambulánsia ne’ebé ita iha labele kobre hotu, maibé ho apoia ambulánsia multifusaun ne’ebé MS apoia ba ami ne’e bele ajuda ami no ba komunidade,” nia subliña.
Tuir dadus, karreta multifunsaun iha Munisípiu Vikeke hamutuk unidade lima (5) no ambulánsia unidade rua (2) ne’ebé foku ba transfere pasiénte bá Baukau. Husi karreta hirak-ne’e kondisaun daudaun ne’e di’ak.
Iha distribuisaun karreta ambulánsia multifusaun ne’e entrega direta husi Vise-Ministru ba Fortalesimentu Institusionál Saúde (VMFIS), José dos Reis Magno ba Prezidente Autoridade Munisípiu Vikeke no kontinua entrega bá Sentru Saúde Munisípiu (SSM) Vikeke.
Partisipa iha distribuisaun ambulánsia ne’e kompostu husi autoridade munisípiu, veteranu, komunidade no pesoál saúde sira husi sentru saúde lima.
Jornalista: Vitorino Lopes da Costa
Editór: Xisto Freitas da Piedade
