Ministru Manetelu klarifika sobu edifísiu terminál pasajeiru Portu Dili tanba konstrusaun ICC
DILI, 22 Jullu 2026 (TATOLI)—Ministru Transporte Komunikasaun, Miguel Gonçalves Manetelu, klarifika kona-ba sobu edifísiu terminál pasajeiru Portu Dili tamba implementa hela projetu konstrusaun Centru Konvensaun Internasionál (ICC, sigla inglés).
Ministru Transporte no Kominikasaun (MTK), Miguel Marques Gonçalves Manetelu, dehan
agora se’e imi husu dehan tanba saida mak sobu, imi hatene katak atu hari’i ICC, resposta mak ne’e.
“Loos dunia, ita lakon sasán rihun $315, tanba inisiu ne’e hanoin no haree katak edifísiu refere la tama iha planu konstrusaun ICC nian. Entaun, tanba ida-ne’e, ita reabilita maibé hafoin ne’e planu tuir mai ne’e foti tomak portu ne’e, ne’ebé ita laiha dalan seluk,” Ministru Manetelu relata ba jornalista sira iha Palásiu Governu, ohin.
Enkuantu edifísiu terminál pasajeiru Portu Dili ne’ebé foin ramata reabilitasaun no entrega ba Ministériu Transporte no Komunikasaun (MTK) iha Novembru 2025, agora hahú ona sobu hodi prepara fatin ba konstrusaun International Convention Center (ICC) iha área Portu Tuan Dili.
Observasaun TATOLI, iha Sábadu (18 Jullu 2026) ne’e, hatudu katak mákina boot sira hahú ona sobu parte balun husi edifísiu terminal atu atrai atensaun públiku tanba edifísiu ne’ebé agora hahú atu sobu ne’e foin deit ramat halo reabilitasaun ho osan Estadu.
Tuir arkivu TATOLI, projetu reabilitasaun Edifísiu Terminal Pasajeiru Portu Dili anunsia ba públiku iha 19 Juñu 2024. Projetu ne’e ho valor kontratu hamutuk $315.575,51, no implementa husi empresa Irmão Sandobe Unipesoál, Lda, depois hetan sertifikasaun husi Autoridade Dezenvolvimentu Nasionál (ADN).
Durante prosesu reabilitasaun, Governu hatete katak servisu ida-ne’e atu hasa’e kualidade atendimentu ba utilizadór transporte marítima sira.
Hafoin liu iha 25 Novembru 2025, empreza implementadora ofisialmente entrega rezultadu reabilitasaun ba MTK, hanesan parte husi esforsu Governu atu hasa’e komfortu no seguransa atendimentu portu.
Maibé, tempu uza edifísiu rezultadu husi reabilitasaun ne’e la naruk. Menus husi tinan ida depois entrega ofisiál, agora edifísiu ne’e hahú ona atu sobu tanba desizaun Governu Timor-Leste atu halo área Portu Tuan Dili hanesan fatin konstrusaun International Convention Center (ICC), ida-ne’e husi projetu estratéjiku nasionál atu prepara Timor-Leste sai Prezidente ASEAN iha tinan 2029.
Iha 20 Maiu 2026, Governu halo ona serimónia hatuur fatuk dahuluk (groundbreaking) ba konstrusaun ICC, ho komemorasaun Tinan 24 Restaurasaun Independénsia Timor-Leste.
Área ida-ne’e sei sai sentru ba konferénsia internasionál, Enkontru Simeira ASEAN, fórum negósiu no atividade internasionál sira seluk. Aléinde husi edifísiu prinsipál, projetu ne’e mós sei inklui auditóriu, sala ezibisaun, promenade iha tasi-ibun, área komersiál no fasilidade turizmu sira seluk. Governu planeia ramata konstrusaun iha 20 Maiu 2028.
Maske projetu ICC konsidera hanesan investimentu estratéjiku atu hasa’e pozisaun Timor-Leste iha rejiaun no apoia dezenvolvimentu setór MICE (Meetings, Incentives, Conferences and Exhibitions), sobu edifísiu ne’ebé foin ramata reabilitasaun bele hamosu pergunta kona-ba planeamentu dezenvolvimentu no efisiénsia uza orsamentu Estadu.
Jornalista : Alexandra da Costa
Editór : Cancio Ximenez
