Grupu Koru Parókia Lakluta reprezenta Dioseze Baukau kompete koru iha Belu
VIKEKE, 05 Agostu 2026 (TATOLI)—Grupu Koru husi Parókia Santo António, Postu Administrativu Lakluta, Munisípiu Vikeke, reprezenta Dioseze Baukau kompete koru iha Atambua, Indonézia.
Eventu kompetisaun ne’e ho naran Garuda Sakti Cross Border Fest Ba Tinan 2026, ho tema “Explore the Border, Feel the Wonder”, hahú husi 04-08 Agostu 2026 iha Kabupaten Belu, Nusa Tenggara Timur (NTT). Eventu ne’e atu promove turizmu, ekonomia kriativa, hametin relasaun amizade entre Indonézia no Timor-Leste.
Koordenadór Grupu Koru Santo António Lakluta, Demildo da Cruz, informa grupu koru husi Postu Lakluta ne’e Bispu Dioseze Baukau mak hili Parókia Santu António Lakluta hodi reprezenta Dioseze Baukau ba partisipa kompetisaun iha Atambua.
“Kompetisaun ne’e konvite husi Atambua ne’ebé fó ba Dioseze tolu mak hanesan Dili, Maliana no Baukau. Nune’e, ba dioseze Baukau nian ami mak hetan konfiansa husi Amu Bispu Baukau, ne’ebé ita preparadu bá tuir kompetisaun,” Demildo da Cruz ba TATOLI liuhusi telefónika, Kuarta ne’e.
Nia dehan daudaun ne’e grupu koru husi Parókia Lakluta iha ona Dili, tuir planu loron aban (06 Agostu) sei aranka bá Atambua.
“Iha loron 7 Jullu dadeer ami halo preparasaun kanta, depoiz iha kalan ami sei partisipa kompetisaun. Rezultadu ami sei rona iha loron 08 Agostu. Se rona rezultadu mak tama finál, entaun ami sei kontinua kanta iha 08 Agostu kalan,” Demildo informa.
Nia esplika kritéria ba partisipante koru ne’e tenke idade 30 ba leten, idade husi 30 mai kraik la prenxe kritériu.
“Maibé, ba prémiu ita seidauk hatene loloos. Ita bá kompete mak foin bele hatene,” nia esklarese.
Iha parte seluk, reprezentante membru koru husi Santu António Lakluta, Atuál Xefe Suku Uma-Tolu, Eduardo Soares, haktuir grupu Koru Parókia Santo António Lakluta lori muzika Igreja nian rua mak sei kompete iha kompetisaun referida.
“Kona-ba kompetisaun ne’e ami hili múzika rua mak sei kompete hanesan Tuhan Kami Tidak Pantas no Bagai Rusa Mendamba Air. Múzika hirak-ne’e ami halo ona preparasaun ho di’ak,” nia subliña.
Tuir dadus, grupu koru husi Santu António Lakluta hamutuk na’in-32 kompostu husi feto na’in-17 no mane na’in-15.
Jornalista: Vitorino Lopes da Costa
Editór: Xisto Freitas da Piedade
