Konklui projetu sistema abastesimentu bee-moos iha Lakluta, komunidade hahú asesu
VIKEKE, 07 Agostu 2026 (TATOLI)—Koordenadór Bee Timor-Leste, Empreza Públika (BTL, E.P.) Munisípiu Vikeke, Marito da Costa, informa konklui ona projetu sistema abastesimentu bee-moos iha Postu Administrativu Lakluta, Munisípiu Vikeke, tan ne’e komunidade hahú asesu bee-moos.
“Empreza finaliza ona servisu sira. Agora daudaun ne’e ita komesa fornese bee ba ita-nia komunidade iha Postu Lakluta Vila,” Marito da Costa ba TATOLI iha Postu Vikeke Vila, Sesta ne’e.
Koordenadór BTL, E.P. Munisípiu Vikeke hatutan servisu sira-ne’ebé empreza implementa konstrui tanki, kanu distribuisaun husi bee-matan hamutuk kilómetru 4.5 no instala kontadór bee.
Nia dehan maski obra ne’e ramata ona maibé obra seidauk entrega nune’e mós seidauk halo pagamentu finál ba empreza.
“Ba obra ne’e seidauk halo pagamentu 100% tanba empreza rasik seidauk aprezenta pedidu pagamentu nian. Tan ne’e mak ita seidauk halo pagamentu ba empreza implementadór Timorindo Unipessoal, Lda,” nia subliña.
Aleinde ne’e, nia dehan, instala ona kontadór ba uma-kain 551, nune’e fulan oin hahú selu bazeia ba kontadór ne’ebé instala ona ba kada uma-kain sira.
Atu tau-matan ba distribuisaun bee-moos, Marito dehan, kontrola bee-moos iha Postu Lakluta BTL, E.P. destaka ona funsionáriu hamutuk na’in-tolu (3) ne’ebé oras-ne’e hala’o servisu hodi kontrola bee.
Entretantu, projetu sistema bee-moos ne’ebé implementa iha Postu Lakluta gasta orsamentu hamutuk $582.100, maski obra ne’e finaliza maibé sei iha tempu retensaun fulan neen hahú fulan oin (Setembru). Sistema bee-moos referidu benefísia komunidade ne’ebé hela iha Postu Lakluta Vila ho totál abitante hamutuk 4.158 no uma-kain 693.
Jornalista: Vitorino Lopes da Costa
Editór: Xisto Freitas da Piedade
