ASM Luka preokupa ba falta tratór boot fila-rai

VIKEKE, 13 Agostu 2026 (TATOLI)—Prezidente Asosiasaun Servi Nodi Moris (ASM), husi Suku Luka, Postu Vikeke Vila, Munisipiu Vikeke, Artur Xavier, preokupa ba tratór boot fila-rai tanba ASM iha rai maibé laiha tratór boot hodi fila-rai hodi kuda produtu agríkola.
“Ami-nia rai atu halo toos ne’e ho totál ektare 25. Agora daudaun ektare sia (9) mak ami konsege halo ba toos hodi kuda modo, ai-dila, hudi, maibé seluk ami abandona tanba laiha ekipamentu hodi apoiu ami fila-rai,” Artur Xavier hateten ba jornalista sira iha Suku Luka, Kinta ne’e.
Nia dehan ASM halo proposta ba Servisu Agrikultura Munisípiu Vikeke, maibé la haruka tratór boot hodi apoiu ASM fila-rai. Tanba ne’e mak oras rai ektre hamutuk 16 sei kontinua abandonadu hela.
“Kona-ba tratór boot ami halo pedidu xefe suku asina no Administradór Vikeke Vila asina hotu mak ami bá hatama iha Servisu Agrikultura Vikeke, maibé to’o agora laiha resposta. Tan ne’e, ami hakarak husu Autoridade Munisípiu Vikeke apoiu tratór boot ba ami hodi fila ami-nia rai,” Artur hato’o.
Hatán ba preokupasaun ne’e, Sekretáriu Munisípiu Vikeke Asuntu Sosiál no Organizasaun Komunitária, Acásio de Sousa, haktuir kona-ba preokupasaun ne’ebé ASM enfrenta ba preokupasaun tratór boot fila-rai, Autoridade Munisípiu Vikeke sei tau ba atensaun.
“Kona-ba preokuasaun husi ita-nia Asosiasaun nian ami autoridade sira la taka dalan. Tanba ita iha tratór hodi apoiu ba ita-nia joven sira-ne’ebé iha inisiativa di’ak, hakarak halo toos ita tenke ajuda duni. Nune’e ba preokupasaun ASM nian ha’u anota hela hodi relata ba Prezidente Munisípiu Vikeke. Tempu badak sei haruka tratór boot atu apoiu agrikultór sira,” nia tenik.
Tuir dadus, trator boot ne’ebé iha Munisípiu Vikeke ho kondisaun di’ak hamutuk unidade 11 no tratór boot hamutuk unidade 17 ho kondisaun aat.
Entretantu, membru Asosiasaun Servi Nodi Moris (ASM) hamutuk na’in-15 kompostu husi mane na’in-sanulu (10) no feto na’in-lima (5) durante ativu halo toos hodi sustenta nesesidade família uma-laran.
Jornalista: Vitorino Lopes da Costa
Editór: Xisto Freitas da Piedade

