BNCTL lansa Mastercard no inaugura edifísiu foun sukursál Likisá

LIKISÁ, 14 Agostu 2026 (TATOLI) – Banku Nasionál Komérsiu Timor-Leste (BNCTL, sigla portugés), Januario da Gama, lansa ofisialmente Mastercard BNCTL, nu’udar pasu foun iha modernizasaun sistema pagamentu no dezenvolvimentu servisu bankáriu dijitál iha Timor-Leste.

Lansamentu ne’e hala’o hamutuk ho inaugurasaun edifísiu foun BNCTL Sukursál Likisá, iha suku Dato, postu administrativu Likisá, munisípiu Likisá, ne’ebé partisipa husi Vise-Primeiru-Ministru no Ministru Koordenadór ba Asuntu Ekonómiku, Francisco Kalbuadi Lay, Prezidente Konsellu Administrasaun BNCTL, Januário da Gama, Governadór Banku Sentrál Timor-Leste (BCTL), Helder Lopes, no konvidadu sira seluk.

Prezidente Konsellu Administrasaun BNCTL, Januário da Gama, hatete lansamentu Mastercard BNCTL ne’e nu’udar parte husi estratéjia banku atu moderniza serbisu bankáriu, promove inovasaun dijitál no aumenta asesibilidade ba servisu finanseiru ba kliente sira iha Timor-Leste.

Tuir nia, kartaun foun ne’e sei permite kliente sira halo tranzasaun ho fasilidade no seguransa, inklui asesu ba rede pagamentu internasionál, hodi responde ba nesesidade finanseira moderna no mellora esperiénsia bankária ba kliente sira.

Dirijente ne’e dehan, iha tinan hirak liubá BNCTL introdús ona servisu dijitál oioin, inklui internét ka mobile banking, ne’ebé permite kliente sira halo tranzasaun iha kualker fatin. Banku mós introdús kartaun Union Pay, ne’ebé fasilita kliente sira bainhira halo viajen bá rai-li’ur no halo pagamentu online.

Aleinde ne’e, BNCTL introdús ajente banku hanesan reprezentante banku iha komunidade, liuliu iha área remota atu aproxima servisu bankáriu ba populasaun no fornese servisu hanesan transferénsia osan no tranzasaun seluk.

“Iha tinan ida-ne’e, BNCTL ho ninia esforsu kolabora ho Mastercard husi Ázia Pasífiku no Indonézia, introdús tan Mastercard BNCTL ne’ebé foin dahuluk lansa iha Timor-Leste hodi responde ba nesesidade kliente no sosiedade país ne’e ninian”, Januário da Gama dehan iha lansamentu ne’e.

Nia subliña katak kartaun ida-ne’e sei permite kliente sira halo tranzaksaun ho fasilidade ne’ebé seguru no asesu ba rede pagamentu nasionál no rede internasionál hodi bele responde ba finanseiru ne’ebé modernu liu, no mellora esperiénsia bankária ba kliente sira hotu, liuliu ba timoroan tantu iha rai-li’ur komu rai-laran.

“Prezensa Mastercard ida-ne’e atu fasilita mós pagamentu ka halo cross-border payments husi ita-nia nasaun ba nasaun seluk, no nasaun seluk mai ita nian. Liuliu ko’alia kona-ba ita-nia adezaun ba ASEAN, Mastercard ida-ne’e sei fasilita tebes ita-nia tranzasaun husi membru país ASEAN nian”, dehan.

Januário realsa katak inovasaun hirak ne’e reflete kompromisu banku atu kontinua promove no hametin inkluzaun finanseira iha Timor-Leste. Tanba antes ne’e, Banku Sentrál Timor-Leste husu katak país tenke iha ona sistema ida atu promove banku ida bolu “iha ita-nia bolsu rasik”. Ho Mastercard ida-ne’e hanesan solusaun mós hodi kontribui ba polítika ne’ebé Banku Sentrál Timor-Leste introdús.

Nia dehan ida-ne’e mós kontribui ba polítika instituisaun reguladora hanesan Banku Sentrál atu minimiza prosesu pagamentu osan fíziku:

Hodi hatete katak inagurasaun esifísiu foun BNCTL Sukursál Likisá sai hanesan kompromisu banku nian atu kontinua hadi’a infrastrutura no ambiente serbisu, hodi fó atendimentu ne’ebé di’ak liu, efisiente no seguru ba komunidade.

“Ida-ne’e hanesan marka signifikativu ida ba reforsa ita-nia setór finanseiru no setór infraestrutura iha rai-laran. Konstrusaun edifísiu foun ida-ne’e hahú iha 17 Marsu 2025 no ramata iha 27 Abríl 2026, kaer husi empreza internasionál no totál orsamentu millaun $1,2”, informa.

Tuir nia, dezde opera iha tinan 2011, BNCTL Sukursál Likisá hatudu kreximentu ne’ebé konsistente iha área bankária, liuhusi aumentu númeru kliente, servisu empréstimu no depózitu, no fortalese patrimóniu. To’o agora, Sukursál ne’e administra patrimóniu hamutuk millaun $29,8 ne’ebé reflete ninia kontribuisaun ba inkluzaun finanseira no dezenvolvimentu ekonomia lokál.

Prezensa BNCTL iha Likisá sai hanesan parseiru ativu kreximentu no dezenvolvimentu sustentavel. BNCTL hala’o ninia funsaun hodi fó apoiu finanseiru no komersiál ba kliente sira tantu individu komu emprezáriu lokál sira. Tanba kriasaun BNCTL ho hanoin ida atu apoia dezenvolvimentu ekonómiku nasionál no kontribui ba redusaun ki’ak iha país ne’e.

Iha biban ne’e, halo lansamentu mós ba dijitál lending ho ninia implementasaun sei halo fazeadamente, maibé husi lansamentu ida-ne’e sei permite atu prosesu sira ba fornesimentu kréditu ho plataforma dijitál nu’udar estratéjia ida atu hamenus burokrasia no promove efisiénsia no efetividade iha atendimentu.

“Ohin halo inagurasaun mós ba mobile banking ita hanaran BNCTL móvel nu’udar inisiativa estratéjiku BNCTL nian atu lori servisu bankária ba komunidade, instituisaun Governu, universidade sira ne’ebé presiza liu, hanesan pagamentu pasaporte, nomós iha universidade fasilita pagamentu propinas, depózitu no seluk tan”, dehan.

Vise-Ministru Koordenadór ba Asuntu Ekonómiku, Francisco Kalbuadi Lay, parabeniza BNCTL ba progresu servisu nian ba dezenvolvimentu ekonomia nasionál no inkluzaun finanseira iha Timor-Leste.

Tuir nia, lansamentu Mastercard ohin reprezenta pasu ida iha prosesu modernizasaun sistema finanseiru no pagamentu iha Timor-Leste.

“Kartaun ida-ne’e sei fó oportunidade ba ita hotu hodi asesu ba meiu pagamentu ne’ebé prátiku, seguru no efisiente, no bele fasilita tranzasaun iha rede komérsiu internasionál, inklui ba tranzasaun iha rai-li’ur tuir kondisaun no regra ne’ebé aplikavel. Ho meiu ida-ne’e, aumenta tan asesu ba servisu finanseiru ne’ebé modernu no promove utilizasaun serbisu dijitál iha Timor-Leste”, hatete.

Tuir nia, ida-ne’e importante tebes tanba ohin loron, teknolojia no dijitalizasaun kontinua muda ema nia moris, halo pagamentu rasik no jere rasik osan.

“Ita presiza prepara ita-nia sistema finanseiru atu responde ba nesesidade komérsiu, investimentu no tranzasaun finanseira ne’ebé sei aumenta entre Timor-Leste no país sira iha rejiaun ASEAN”, katak.

Nia realsa katak modernizasaun sistema finanseiru la bele haree de’it husi perspetiva teknolojia no infraestrutura. Presiza garante katak sidadaun sira iha koñesimentu no kapasidade atu uza servisu finanseiru ho maneira seguru no responsavel.

Tanba ne’e, literasia finanseira sai elementu fundamentál. Kliente sira presiza komprende oinsá atu uza kartaun, oinsá atu halo pagamentu dijitál ho seguransa, oinsá atu proteje sira-nia PIN no dadus pesoál, no atu identifika no evita fraude no scam finanseiru.

Lansamentu Mastercard mós iha ligasaun direta ho objetivu inkluzaun finanseira. Signifika katak atu garante sidadaun hothotu, inklui komunidade ne’ebé rezide iha área rurál no komunidade ne’ebé seidauk iha asesu di’ak ba servisu bankáriu, iha oportunidade atu asesu no utiliza servisu finanseiru ne’ebé apropriadu, seguru no asesivel.

BNCTL nu’udar Banku Komersiál Estadu nian marka ona ninia dezempeñu ne’ebe di’ak tebes no kontribui ba diversifikasaun ekonomia rai-laran. BNCTL konsolida nia pozisaun boot liu iha Timor-Leste, ne’ebé reforsa nia lideransa tantu iha depózitu komu kréditu.

Atinjimentu ida ne’e hatudu liu husi dezempeñu iha tinan 2025 ne’ebe BNCTL domina kuota merkadu ho 78% iha kréditu ekivalente ho millaun $497 no depózitu 43% ekivalente millaun $840 no atinje billaun $1.030 iha ativu. Ida-ne’e konsolida Banku nia pozisaun nu’udar instituisaun finanseira prinsipál iha país.

Rezultadu hirak ne’e reprezenta kapasidade finanseira nasionál hodi mobiliza rekursu no transforma rekursu sira ne’e ba oportunidade ba komunidade no ekonomia, tanba husi finansiamentu kréditu ne’e rasik mak apoia negósiu, projetu, investimentu, agrikultura, transporte no nesesidade seluk tan.

Governadór BCTL, Helder Lopes, husu BNCTL kontinua  ba oin, labele para ho lansamentu Mastercard tanba daudaun banku barak iha mós kompetisaun ne’ebé barak.

“Husi indikadór depózitu ninian BNCTL kapta fundu públiku ka ema ba tau osan iha ne’ebá, nomós Governu nia osan ne’ebé tau iha instituisaun finanseira. Nia mak hetan marketeiru boot liu iha Timor-Leste. Tanba ne’e, BNCTL nu’udar instituisaun ne’ebé labele moras no labele monu, tanba ninia prestasaun servisu iha país ne’e”, dehan.

Nia dehan prezensa BNCTL importante tebes tanba mai ho prioridade estratéjika tolu mak espande merkadu kréditu iha rai-laran, promove dijitalizasaun servisu finanseiru no promove inkluzaun finanseira.

“Daudaun BNCTL domina hela merkadu kréditu iha ita-nia, maibé ba oin hakarak domina nafatin tenke presta servisu ho didi’ak tanba agora banku barak ne’ebé kompetitivu, entaun atu hetan konfiansa husi kliente sira, tenke iha inovasau “, nia konklui.

Iha lansamentu kartaun Mastercard BNCTL partisial husi membru Governu, membru Parlamentu, eis titulár sira no seluk tan.

Jornalista: Arminda Fonseca 

Editora: Maria Auxiliadora