Autoridade Vikeke hahú muda vendedór bá merkadu Olobai
VIKEKE, 24 Agostu (TATOLI)—Koordenadór Servisu Muda Vendedór, atuál Sekretáriu Munisípiu Vikeke Asuntu Sosiál no Organizasaun Komunitária, Acacio de Sousa, informa ekipa konjuta kompostu husi seguransa sivíl no polísia tun muda vendedór sira iha merkadu antigu Vikeke Vila bá merkadu Olobai ne’ebé Autoridade Munisípiu Vikeke prepara ona ba negosiante sira.
“Ohin ita tun ho ekipa konjutan ida hodi apoia ba ita-nia negosiante sira muda bá merkadu Olobai, tanba fatin ne’ebé seguru inklui prepara kondisaun sira hanesan bee, eletrisidade, saneamentu no morru protesaun ba negosiante sira hodi hala’o negósiu. Antes ne’e, ita-nia ekipa sira fó uluk tempu hahú iha loron 10 Agostu 2026, no iha loron 24 Agostu ida-ne’e, ita muda obrigatóriu,” Acacio de Sousa ba TATOLI iha merkadu antigu Vikeke Vila, Segunda ne’e.
Notísia relevante: Autoridade Vikeke fó ultimatu ba negosiante sira iha merkadu antiga muda bá merkadu Olobai
Koordenadór ne’e relata muda vendedór sira iha merkadu Antigu Vikeke Vila ne’e negosiante hotu-hotu koopera di’ak ho autoridade hodi sobu sasán sira muda ba merkadu Olobai.
Nia aprezenta katak negosiante ne’ebé durante hala’o negósiu iha merkadu antigu hamutuk 89 ne’ebé agora muda hotu bá merkadu Olobai.
Iha fatin hanesan, Diretora Jestaun Merkadu no Turizmu (JMT) Munisípiu Vikeke, Mirandolina Fátima da Costa Guterres haktuir, kona-ba prosesu muda negsoiante sira-ne’e ekipa husi JMT hahú identifikasaun, rejista negosiante sira no distribui billete ba negosiante sira.
“Nune’e molok muda ita-nia negosiante sira-ne’e ita mós halo enkontru ho ita-nia negosiante sira. Depoiz ita enkontru ho negosiante sira, ita mós fó kalendáriu muda negosiante sira. Iha kalendáriu muda negosiante sira-ne’e hahú iha 10 Agostu to’o 23 Agostu 2026, negosiante sira halo preparasaun hodi haloot sasán. Ohin ne’e, ita ho ekipa tun sobu obrigatóriu,” nia esplika.
Daudauk ne’e, nia dehan, negosiante purvolta 30-resin halo ona atividade negósiu iha merkadu Olobai no negosiante sira-ne’ebé simu ona billete ne’e sei muda hotu bá merkadu Olobai.
Tuir dadus, negosiante ne’ebé muda bá merkadu Olobai hamutuk 189 kompostu husi merkadu antigu Vikeke Vila negosiante hamutuk 89, fa’an sasán no modo sira iha dalan ninin hamutuk 100.
Iha okaziaun ne’e, reprezentante negosiante merkadu antigu Vikeke Vila, Sebestião Faria Guterres, hateten parte negosiante sira koopera ho dezisaun Estadu nian ne’ebé muda negsiante sira bá iha merkadu Olobai.
Tuir observasaun jornalista TATOLI katak muda negesiante sira husi merkadu antigu Vikeke Vila hahú iha tuku 09:00 Otl, situasaun la’o ho hakmatek bainira ekipa konjunta muda vendedór hirak-ne’e, tanba hetan seguransa másima husi Polísia Nasionál Timor Leste (PNTL) Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
