Konstrusaun EBF Bobomanat iha Oésilo hatudu daudaun mudansa signifikativa

OEKUSI, 24 Agostu 2026 (TATOLI) – Projetu reabilitasaun saladeaula ba Eskola Bázika Filiál (EBF) 1,2,3 Nove Setembru Bobomanat iha Tumin suku Bobometo sub-rejiaun Oésilo Rejiaun Administrativa Espesiál Oekusi Ambeno (RAEOA), ne’ebé hetan apoia husi Gabinete Prezidente Prezidente Repúblika, daudaun ne’e nia progresu servisu atinje ona 70%.

Diretór Servisu Rejionál Edukasaun Oekusi, Vincêncio Cono, informa katak materiál atu halo reabilitasaun ba eskola referida, hetan apoia másima husi Gabinete Prezidente Repúblika.

“Apoia materiál ba reabilitasaun nian, husi Gabinete Prezidente Repúblika atuál, atu reabilita EBF 1,2,3 Nove Setembru Bobomanat. Iha fulan-Jullu 2026, ita hahú, oras ne’e daudaun nia servisu fíziku atinje ona 70%,” nia hateten iha Oekusi, ohin

Autoridade edukasaun rejionál ne’e hateten tan katak item servisu iha reabilitasaun ne’e maka, reabilita edifisíu ida, no saladeaula, hodi troka zinku ferujén, ne’ebé bazea fiskalizasaun husi parte edukasaun iha fulan-Agostu ne’e, nia servisu fíziku to’o 70%.

Notísia relevante:PR Ramos-Horta apoia materiál konstrusaun ba EBF Bobomanat iha Oésilo

Koordenadór EBF 1,2,3 Nove Setembru, Jacinto Soni, agradese ba apoia husi Xefe Estadu, nune’e bele reabilita saladeaula tolu, iha eskola referida.

“Agradese tebes tanba Avo Horta tulun ami, apoia ne’e osan ho monta rihun $8-resin, no  kompra sasán ne’e, direita husi Gabinete Prezidente Repúblika hodi halo saladeaula tolu. Kona-ba reabilitasaun maka hasai kalén ne’ebé ku’ak ona, plafon mós hasai hotu, no reboka inklui monta keramíka. Ne’ebé, servisu daudaun ne’e monta hela keramíka,” nia hateten.

Projetu reabilitasaun ne’e sei lori benefísiu diretu ba estudante na’in-447 ne’ebé daudaun ne’e hala’o estudu iha estabelesimentu ensinu ne’e, hamutuk ho profesór na’in-13.

Jornalista: Abílio Elo Nini

Editór: Rafael Ximenes de A. Belo