SEI prevee rihun $90 ba selebrasaun loron nasionál feto
DILI, 26 Agostu 2026 (TATOLI)—Sekretária Estadu Igualdade (SEI) prevee orsamentu hamutuk rihun $90 ba selebrasaun loron nasionál feto ba da-50, ne’ebé sei hala’o iha Tapo, Munisípiu Bobonaru iha loron 03-06 fulan-Novembru 2026.
Sekretária Estadu Igualdade, Elvina de Sousa Carvalho, hateten komemorasaun Aniversáriu Loron Nasionál Feto Timor nian ba da-50 ne’e ho tema “Feto Timor-Leste: Hodi Selebra Tinan 50 Igualdade no Inkluzaun” no ho lema “Ami, Feto Timoroan sira sei nunka rende, ami sei luta nafatin hodi hetan Igualdade no Inkluzaun”.
Nia hatutan, Sekretária Estadu Igualdade ohin SEI halo aprezentasaun ida iha Konsellu Ministru atu define rezolusaun ida kona-ba selebrasaun loron nasionál feto ne’e.
“Ita boot sira hatene katak selebrasaun ba tinan ne’e la’ós hanesan baibain maibé selebrasaun ba da-50 (tahun emas), entaun importante tebes atu ita selebra hodi rekoñese eroína sira-nia kontribuisaun ba luta ukun rasik-an,” nia informa ba jornalista sira iha Palásiu Governu, ohin.
Governante ne’e dehan, selebrasaun ne’e mós sai momentu di’ak ida atu inspira juventude feto sira hodi banati tuir dalan husi eroína sira-nian.
Nia hatutan, selebrasaun ne’e sei hala’o iha Tapo (Bobonaru) tanba inspira husi eroína Maria Tapo, atu nune’e ema barak bele hatene istória “Maria Tapo”. Loron nasionál feto sei sei involve entidade hotu-hotu espesialmente feto, tanba sei iha atividade semináriu, diálogu no aprezentasaun kulturál.
Enkuantu komemorasaun sira ne’e ho objetivu atu fó onra no rekoñese kontribuisaun istóriku hosi feto timoroan sira, reforsa kompromisu ba igualdade jéneru no inkluzaun sosiál no mós promove partisipasaun ativa hosi feto sira iha dezenvolvimentu nasionál.
Programa ne’e mós iha intensaun atu fó omenajen ba jerasaun feto sira-ne’ebé durante tinan 50 ikus ne’e, kontribui ona ba independénsia, pás no dezenvolvimentu Timor-Leste nian.
Sekuénsia programa loron nasionál feto
Programa ne’e inklui serimónia abertura ida iha loron 03 fulan-Novembru tinan 2026, iha Munisípiu Bobonaru, hodi fó omenajen ba Eroína Nasionál Maria Tapó, ho atividade kulturál no desportiva, misa agradesimentu nomós diálogu komunitáriu.
Iha loron 06 fulan-Novembru, sei hala’o serimónia ofisiál nasionál iha Centro de Convenções de Díli, ne’ebé inklui semináriu ida kona-ba feto sira-nia kna’ar hodi harii dame, igualdade no dezenvolvimentu, espozisaun kona-ba feto sira-nia kontribuisaun ba rezisténsia nasionál no konstrusaun Estadu no mós atividade kulturál no artístika. Prevee mós atividade komemorativa iha munisípiu sira.
Tanba ne’e, Sekretaria Estadu Igualdade mak responsavel ba koordenasaun jerál ba komemorasaun sira nomós ba estabelesimentu ninia komisaun organizadora, iha kolaborasaun ho ministériu kompetente, autoridade munisípiu, organizasaun sosiedade sivíl sira, parseiru dezenvolvimentu no entidade relevante sira seluk.
Jornalista : Alexandra da Costa
Editór : Cancio Ximenes
