Embaixadór Austrália apresia joven na’in-500 partisipa akampamentu iha Ossú
VIKEKE, 04 Setembru 2026 (TATOLI)–Embaixadór Australia iha Timor-Leste, Aaron Watson, apresia tebes ba joven na’in-500 ne’ebé partisipa iha akampamentu iha Suku Osorua, Postu Ossú, Munisípiu Vikeke, hodi aprende kona-ba konservasaun bee no rai hodi redús risku dezastre iha Timor Leste.
“Ha’u sente orgullu servisu hamutuk ho organizasaun PERMATIL ba realizasaun akampamentu ida-ne’e. Austrália suporta akampamentu ba juventude barak ne’ebé maihusi fatin oioin mai partisipa hodi aprende kona-ba ambiente, aprende mudansa klimátika. Asuntu ida-ne’e sai importane ba Timor-Leste, nune’e Austrália suporta hodi servisu hamutuk ho organizasaun PERMATIL realiza akampamentu iha Munisípiu Vikeke,” Aaron Watson dehan hafoin vizita diretamente iha akampamentu iha Suku Osorua, Sesta ne’e.
Notísa relevante: https://tatoli.tl/2026/09/02/organizasaun-hadaek-realiza-akampamentu-ba-konservasaun-bee-no-rai-hodi-redus-risku-dezastre-iha-ossu/
Emabaixadór Austrália ne’e haktuir katak Austrália implementa projetu rua iha Timor-Leste kona-ba mudansa klimátika no área muzíka ne’ebé servisu hamutuk ho organizasaun PERMATIL.
“Ami iha projetu rua ne’e Governu Austrália aloka orsamentu hamutuk rihun $50 ne’ebé mak daudaun ne’e ita implementa iha Timor-Leste hanesan projetu mudansa klimátika no ami iha projetu múzika servisu hamutuk ho artista Ego Lemos, artista Olanda Rosária no artista husi Austrália ne’ebé mai Vikeke hodi anima juventude iha akampamentu ida-ne’e. Ami sente kontente loos bele haree joven sira iha interese aprende tanba mudansa klimátika ne’e importante. Tan ne’e, iha akampamentu ne’e joven sira aprende kona-ba kuda bee, akaptasaun bee, kantadeiru, kria debu no buat barak mak sira bele aprende ba asuntu klimátiku nian,” Aeron subiliña.
Nune’e, nia husu joven sira-ne’ebé partisipa akampamentu durante loron lima (5) ne’e bainhira fila bá idaidak nian fatin, implementa temátika sira-ne’ebé aprende iha akampamentu ida-ne’e.
Iha fatin hanesan, Prezidente Autoridade Munisípiu Vikeke, Francisco Cruz Simões de Gonzaga Soares, hateten programa akampamentu ne’ebé realiza iha Munisípiu Vikeke importante tebes tanba fó oportunidade ba joven sira aprende oinsá prezervasaun ba bee no redús risku dezastre naturál sira.
“Ha’u sente programa akampamentu ida-ne’e di’ak tebes tanba bele fahe koñesimentu ba joven sira-ne’ebé partisipa hodi aprende kona-ba konservasaun bee, halo adubu orgániku tanba bele ajuda ita-nia agrikultór sira no mós aprende oinsá prodús hahán animál nian. Se tinan oin hakarak realiza tan iha Vikeke ami prontu apoiu,” nia hato’o.
Iha biban hanesan, partisipante akampamentu husi Postu Bobonaru, Munisípiu Bobonaru, Marito Pereira Vitór, sente kontente partisipa iha akampamentu tanba bele aprende kona-ba prodús ai-horis sira sai fali adubu orgániku.
“Durante iha fatin akampamentu, ami aprende buat barak. Ita haree ai-horis sira-ne’ebé laiha valór, maibé ami aprende iha ne’e ai-horis sira-ne’e bele sai fali adubu orgániku. Entaun, ami sente katak buat ne’ebé ami aprende ne’e benefísia tebes ami. Nune’e, bainhira ami fila bá ami-nia munisípiu ami sei introdús fali bá ami-nia agrikultór sira,” nia subliña.
Kona-ba akampamentu ne’e, organizasaun PERMATIL servisu hamutuk ho organizasaun HADAEK hodi oferese formasaun ba partisipante sira iha akampamentu hanesan prosesu konservasaun bee, kantadeiru, prosesu produsaun hahán balada, debu, adubu orgániku no seluk tan. Nune’e, iha vizita ne’e, Embaixadór Austrália ho nia komitiva hamutuk ho PERMATIL vizita direta bá fatin sira-ne’ebé partisipante sira pratika hanesan kria debu, konservasaun bee, prosesa adudu orgániku, kantadeiru iha Suku Osorua.
Entrentantu, partisipa iha akampamentu ne’e partisipante hamutuk na’in-500 ne’ebé maihusi munisípiu sira hanesan Munisípiu Lautein, Ermera, Bobonaru, internasionál inklui joven sira iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
