Deputadu Mandati husu investigasaun kle’an ba kazu hamate Terezinha Cardoso iha Covalima
DILI, 07 Setembru 2026 (TATOLI) – Membru Komisaun B Parlamentu Nasionál ne’ebé trata Asuntu Negósiu Estranjeiru, Defeza no Seguransa, David Dias Ximenes “Mandati”, husu atu halo investigasaun kle’an ba arguidu na’in-haat ne’ebé deskonfia halakon Terezinha Cardoso nia vida iha aldeia Wetaba, postu administrativu Tilomar, munisípiu Kovalima.
Membru na’in-tolu ne’ebé alegadamente nu’udar membru Servisu Nasionál Intelijénsia (SNI) no arguidu ida membru Unidade Patrullamentu Fronteira (UPF), ne’ebé kaptura iha loron 31 Agostu 2026, hodi submete ba primeiru interrogatóriu iha Tribunál Judisiál Primeira Instánsia Suai hodi aplika medida prizaun preventiva.
Nia hatete katak presiza investigasaun kle’an atu hatene motivu loloos ho nia evidénsia hodi prosesa tuir dalan legál. Maski nune’e, nafatin respeita prezunsaun inosénsia.
“Akontesimentu ne’e sei iha nivel investigasaun ne’ebé ita hein, só bele ko’alia bainhira to’o ona iha tránzitu julgadu finál ona. Se sala duni ne’e lamenta tebes”, nia hatete.
Deputadu ne’e preokupa ho sidadaun balun kontinua ultrapasa liña fronteira ho dalan ilegál bá Indonézia ne’ebé deskonfia husi membru organizasaun arte marsiál balun ho objetivu bá sa’e sintu.
“Ne’ebé, ha’u-nia hanoin arte marsiál ne’e idaidak ho nia prinsípiu. Agora, oinsá mak ita halo ita-nia promosaun halo de’it iha Timór”, nia sujere.
Tuir nia, medida ne’e parte ida atu iha futuru bele labele mosu tan hanesan akontesimentu daudaun ne’e.
Portavós Komandu Jerál Polísia Nasionál Timor-Leste (PNTL), Superintendente Xefe Polísia Joao Belo dos Reis, antes ne’e informa katak arguidu na’in-haat ne’ebé suspeitadu oho Terezinha Cardoso kumpre prizaun preventiva.
Krime omisídiu ne’e akontese iha iha fulan-Jullu tinan 2026. Suspeitu na’in-haat ne’e Tribunál aplika medida koasaun prizaun preventiva tanba iha indísiu sufisiente ba krime ne’ebé Ministériu Públiku promove ba sira.
Notísia relevante: https://tatoli.tl/2026/09/03/tjpis-aplika-prizaun-preventiva-ba-arguidu-nain-haat-suspeitadu-komete-omisidiu/
Jornalista: Nelson de Sousa
Editora: Maria Auxiliadora
