Top

SMAPPF Vikeke apoia mákina ko’a hare modernu fasilita agrikultór sira

SMAPPF Vikeke apoia mákina ko'a hare modernu fasilita agrikultór sira. Imajen TATOLI/ Vitorino Lopes da Costa

VIKEKE,  10 Setembru  2026 (TATOLI)—Servisu Ministériu  Agrikultura Peska, Pekuária no Floresta (SMAPPF) Munisípiu Vikeke apoia mákina ko’a hare modernu ba agrikultór sira iha Postu Administrativu Vikeke Vila no Uatulari.

Xefe Departamentu Estensaun Agríkola SMAPPF Munisípiu Vikeke, Feliciano Soares, hateten ekipamentu modernu ko’a hare nian ne’ebé MAPPF koloka mai Munisípiu Vikeke hamutuk unidade lima atu fasilita agrikultór sira ko’a hare.

“Husi unidade lima ne’e ita koloka ona bá agrikultór sira atu ko’a hare. Ekipamentu ko’a hare ne’e ko’a hamoos no enxe kedas ba saku laran, la presiza sama tan. Ha’u sente ekipamentu ne’e fasilita tebes ita-nia agrikultór sira,” Feliciano ba TATOLI, iha Postu Vikeke, Kinta ne’e.

Nia esplika katak daudaun ne’e ekipamentu ko’a hare nian koloka iha natar Uedare, Suku Luka, iha unidade rua, ba natar Beasu unidade ida, ba natar Makadike unidade ida no makína ko’a hare unidade ida mak sei iha Sentru Agrikultura Ratahu.

“Ekipamentu ba ko’a hare ne’e ita fasilita de’it ba ita-nia sira, maibé hafoin kolleta hotu sei entrega ba MAPPF Vikeke, tanba ekipamentu ne’e labele intrega ba agrikutór sira. Ita fasilita agrikultór sira para ajuda ko’a hare, maibé bainhira hotu ita bá foti fali hodi halo manutesaun iha Sentru Ratahu,” nia hato’o.

Feliciano relata, atu apoia ekipamentu ko’a hare, grupu agrikultór sira presiza halo pedidu ba Servisu MAPPF Munisípiu Vikeke, hafoin tékniku sira haree no koloka makína ba agrikultór sira hodi ko’a hare.

Iha fatin ketak, Koordenadór Grupu Wedare Badak,  Cosme Gomes Guterres, sente kontente ba apoiu ekipamentu ko’a hare ne’e tanba redús gastu durante ko’a hare no sama hare.

“Ha’u sente tempu agora diferente tebes tanba uluk ami ko’a hare ho liman, presiza loron rua-tolu mak foin ko’a hotu. Maibé, agora ita uza ekipamentu modernu ida-ne’e la paresiza ema barak, ema na’in-rua ka tolu bele ko’a no enxe kedas ba saku. Ida-ne’e ha’u sente orgullu tebes tanba uza mákina ne’e di’akliu, ita la estraga hare, depoiz hakmaan ami-nia servisu iha natar laran,” nia tenik.

Jornalista: Vitorino Lopes da Costa

Editór: Xisto Freitas da Piedade

Publisidade

Leave a Reply

Latest Post

error: Content is protected !!