Deputada husu Governu aselera indemnizasaun ba família afetada ba despezu administrativu iha Kampung Alór
DILI, 29 Setembru 2026 (TATOLI)-Deputada husi bankada Frente Revolusionária Timor-Leste Independente (FRETILIN), Cristina Yuri Ribeiro, ezije Governu atu aselera prosesu indemnizasaun ba família afetada ba despeju administrativu iha Kampung Alór, Dili.
Nia dehan iha uma-kain 104, ho totál membru hamutuk 850, ne’ebé afeta husi despeju administrativu iha 23 Juñu no 3 Jullu 2026 iha suku Kampu Alor, aldeia Hamahun. Família sira-ne’e iha labarik, inan-aman, ferik-katuas no ema sira ne’ebé depende ba sira-nia uma no atividade ekonómika loroloron atu sustenta família.
Nia la kontra dezenvolvimentu no apoiu Governu iha planu dezenvolvimentu no projetu infraestrutura ne’ebé presiza implementa, maibé dezenvolvimentu tenke lori povu ba oin, la’ós husik povu iha kotuk.
“Se uma-kain sira tenke sai houi sira-nia hela-fatin, tanba interese públiku, Governu tenke garante katak sira simu sira-nia direitu iha tempu ho prosesu transparente no ho tratamentu dignu”, nia levanta liuhusi reuni aun plenária Parlamentu Nasionál, ohin.
Tuir informasaun ne’ebé disponivel, família sira relata katak iha promesa kona-ba pagamentu indemnizasaun iha prazu badak, maibé tempu liu ona no família sira seidauk simu sira-nia direitu.
“Tanba ne’e, ha’u husu klarifikasaun ba Governu, saida mak obstákulu prinsipál ne’ebé halo prosesu indemnizasaun ida-ne’e naruk, no importante liután binhira mak uma-kain 104 sei simu sira-nia indemnizasaun?”, nia kestiona.
Deutada solisita ba Governu atu fó prazu klaru, informasaun transparente no komunikasaun regulár ba família sira, tanba família ida ne’ebé lakon uma no hela-fatin labele hein indefinitivamente.
Kompensasaun mós, tuir nia, tenke haree la’ós de’it hanesan pagamentu, maibé hanesan mekanizmu atu ajuda família sira halo tranzisaun ba moris ida-ne’e.
Vise-Ministru ba Asuntu Parlamentár, Adérito Hugo, rejista preokupasaun ne’e no sei envia ba ministru tutela hodi bele fó resposta.
Jornalista: Nelson de Sousa
Editora: Maria Auxiliadora
