Autoridade sei muda fatin tratamentu saúde ne’ebé instala iha suku Kutete
OEKUSI, 01 Outubru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Servisu Rejionál Saúde, sei muda fali fatin tratamentu saúde, ne’ebé antes ne’e instala iha aldeia Mahata suku Kutete sub-rejiaun Pante Makasar, tanba fatin referida ladun favoravel tanba besik liu Eskola Bázika Filiál (EBF) Mahata.
Diretora Servisu Saúde Rejionál Oekusi, Odete Amado Martins, informa katak fasilidade saúde ne’ebé instala iha aldeia Mahata, nu’udar fatin tratamentu suku nian, atu fó atendimentu saúde ba komunidade sira.
“Ita tau iha fatin ne’e hodi asegura pasiente sira-ne’ebé ho moras urjente ruma karik, pesoál saúde sira bele atende, maibé ita haree fatin ne’e loloos ba edukasaun nian, tanba besik eskola, entaun ita halo ona koordenasaun iha tempu-badak, atu buka fali fatin atu koloka pesoál saúde sira ba fatin seluk, maibé ita sei koordena ho Autoridade lokál sira, nune’e bele buka fali fatin seluk, hodi muda husi fatin ne’e atu fó espasu ba edukasaun ba prosesu aprendizajén iha fatin ne’e,” diretora ne’e hateten.
Notísia relevante:Autoridade RAEOA estabelese postu saúde iha Kutete
Xefe Suku Kutete, José António Bana, afirma, daudaun ne’e autoridade lokál sira identifika ona fatin, nune’e iha tempu-badak sei muda ba fatin ne’ebé identifikadu ona.
“Fatin tratamentu ne’e provizóriu, nia problema kle’ur ona, ha’u koordena ona parte saúde no edukasaun, ne’ebé edukasaun ho saúde importante ba suku Kutete, atu fasilita oan sira asesu eskola no saúde mós atu tulun komunidade sira bele hetan tratamentu ne’ebé besik, entaun ami buka ona fatin, tempu-badak sei muda fatin tratamentu saúde ne’e ba dormitóriu alfandega nian, tanba fatin dadaun ne’e afeta ba estudante sira ne’ebé besikliu,” nia hateten.
Notísia relevante:Progresu fíziku konstrusaun postu saúde iha suku Kutete atinje ona 28%
Rekorde fali katak, fatin tratamentu saúde iha aldeia Mahata suku Kutete, hahú instala iha inisíu Janeiru 2025, hodi fasilita komunidade sira bele asesu ho distánsia besik, tanba asesu ba postu saúde Kiomaonteko no Hospitál Referál Oekusi ho distánsia do’ok.
Jornalista: Abílio Elo Nini
Editór: Rafael Ximenes de A. Belo
