Estudante bolseiru na’in-29 hasoru Prezidente Repúblika molok bá estuda iha Portugál
DILI, 09 Outubru 2026 (TATOLI)-Estudante bolseiru na’in-29 husi Sentru Linjístiku, Kultura no Treinamentu Vokasionál Institute of Bussines (IOB), hasoru malu Prezidente Repúblika, José Ramos-Horta, hodi despede molok bá hala’o estudu iha Portugál.
Reitór IOB, Pedro Ximenes, esplika katak estudante na’in-29 ne’e halo parte grupu rua, grupu ida na’in-21 sei bá eskola Universidade Politéknika Bragança Portugál no na’in-ualu sei bá Eskola Sekundária Tékniku Vokasionál.
“Entaun antes bá, ohin ami lori ita-nia estudante bolseiru na’in-29 mai hasoru Prezidente Repúblika hanesan mós aman nasaun atu despede no husu mós Prezidente Repúblika ninia lia-menon molok sira bá hala’o estudu iha Portugál”, Pedro Ximenes hatete.
Nia esplika katak programa ne’e sira hala’o kedas iha 2017 to’o agora. Totál benefisiáriu husi programa ne’e besik ona estudante 300.
Reitór ne’e dehan kooperasaun ne’e entre IOB no Universidade Politéknika Bragança Portugál ka instituisaun ho instituisaun no hetan kedas apoiu husi Governu rua, Portugál no Timor-Leste, ho mós kooperasaun envolvimentu husi inan-aman sira.
“Signifika katak laiha enkargu ba Governu. Inan-aman sira, Governu Portugés, Governu Timor-Leste ho eskola sira mak apoi, nune’e estudante sira ne’e konsege bá iha Portugál. Totál estudante 300 ne’ebé ita haruka dezde 2017 ne’e maiória bá Eskola Téknika Vokasionál no 40% mak bá iha Ensinu Superiór Poletékniku Bragança”, nia dehan.
Nia eseplika katak estudante 29 ne’e bá eskola tinan diferente, tanba balun ba Ensinu Tékniku Vokasionál ne’e tinan tolu, no sira ba Ensinu Superiór Vokasionál ne’e tinan rua, balun tinan tolu, no balun to’o tinan haat.
Dirijente IOB haktuir katak iha sorumutu ne’e, Prezidente Repúblika mós hato’o mensajen simples ba estudante sira mak primeiru estuda. “Saida de’it mak ita halo, ita tenke hanoin katak, ita bá iha Portugál ho objetivu atu estuda”.
Xefe Estadu hato’o katak Portugál ne’e país ida ne’ebé avansadu ho kualidade edukasaun ne’ebé hanesan iha eskola iha Europa tomak, ne’e duni di’ak tebe-tebes estudante sira bá aproveita oportunidade estrada ho di’ak.
Ramos-Horta luova inisitiva ne’ebé IOB halo hodi fasilita estudante sira bá. Nia mós hatete katak labele foti razaun lia-portugés ne’e difísil, maibé timoroan sira barak iha Xina, Vietname, no Koreia bele hatene ema nia lian, ne’e duni esforsu atu estuda didi’ak.
Estudante bolseiru, Glória Patrícia Freitas da Silva, orgullu bele hetan oportunidade bá eskola iha Portugál.
Nune’e mós estudante Jonas Barreto Lopes subliña katak bainhira simu mensajen husi Prezidente Repúblika sente katak sira bele lori mensajen ne’e sai hanesan bukae ba sira hodi hala’o estudu to’o ramata.
“Ami sei lori mensajen to’o iha Portugál no sente katak ami bele kaer nafatin Prezidente Repúblika nia liafuan hodi nafatin hala’o ami-nia estuda iha Portugál”, nia konklui.
Jornalista: Arminda Fonseca
Editora: Maria Auxiliadora
