DILI (TATOLI)—Golu rua ne´ebé maka hatama hosi jogadór Indonézia, Masrudin iha minutu 25 no 89, konsege lori vitória dahuluk ba ekipa Assalam FC, hafoin halakon Sporting Clube de Timor ho golu 3-0 iha Estádiu Municipál de Dili, Kuarta horsehik.
Golu dahuluk hosi jogadór nasionalidade Indonézia ne’e laiha mudansa to´o primeira parte ramata hodi lori Assalam FC lidera 1-0.
Tama ba segunda parte, Assalam FC aumenta tan golu iha minutu 74. Golu ne´e rezulta hosi jogadór Indonézia, Deni Pramono. La kle´ur de´it, Masrudin, aumenta tan golu iha minutu ikus ka minutu 89, hodi lori Assalam FC taka jogu lokoraik ne’e ho golu 3-0.
Antes ne´e, Assalam FC, hetan derota 1-0 hosi ekipa Atletico Ultramar, ne´ebé maka lidera hela grupu B segunda divizaun Liga Futeból Amadora époka daruak ho pontus 6. Rezultadu ida ne´e, Assalam FC haksoit sai hosi pozisaun 6, ka zona degradasaun hodi túr provizoriamente iha pozisaun 4 ho pontus 3.
Iha parte seluk, Sporting Clube de Timor mantein nafatin iha pozisaun 2, ho pontus 4 hanesan mós ho ekipa Aitana FC ne´ebé maka sei kontra ekipa Atletico Ultramar iha Kinta (30/3/17). (Jornalista: Xisto Freitas/ Editor : Alberto Alves)
