DILI, (TATOLI) – Prezidente Repúblika, Taur Matan Ruak ho Prezidente eleitu, Francisco Guterres Lú-Olo, tersa, (11/4) hasoru malu hodi diskute kona-ba tranzisaun servisu molok asume kargu nu’udar Xefe Estadu iha maiu 2017.
“Prezidente eleitu ohin mai vizita ha’u hodi koñese uma ne’ebé nia atu hela no ha’u kontente loos”, Taur Matan Ruak hatete ba jornalista sira iha Palásiu Prezidensiál Bairopite.
Atuàl ema nùmeru um iha Nasaun ne’e promete hodi fó nafatin apoiu ba Lù-Olo durante mandatu. “Ita hotu fó apoiu ba prezidente eleitu, kuandu nia mai servisu iha ne’e para tau matan ba ita hotu”, katak tan.
Prezidente eleitu ho ekipa tranzisaun hosi parte rua sei hahú tranzisaun servisu iha loron 13 fulan-abril 2017 to’o inisiu maiu.
“Prinsípiu ha’u nia ekipa sei fila fali hodi relata kona-ba atividade saida de’it maka la’o iha Prezidensia Repúblika hodi hola desizaun hamutuk atu hametin nafatin instituisaun ida no labele hosi mamuk”, Lú-Olo informa mós ba jornalista sira.
Abrão de Vasconcelhos maka lidera ekipa tranzisaun hosi prezidente eleitu hamutuk kuaze ema nain 10 maka sei hala’o servisu durante periodu tranzisaun. Enkuantu kona-ba Xefe Kasa Sivíl no Militár, Lú-Olo lakohi públika ba públiku.
“Kuandu ha’u mai tama ona servisu maka ha’u sei mai ho Xefe Kasa Sivíl no Kasa Militár”, tenik tan.
Enkontru ne’e ko’alia kona-ba lei eleisaun parlamentár ne’ebé Prezidente Repúblika haruka ona ba Tribunál Rekursu tanba duvida ho konstituinalidade hosi lei ne’e rasik.
“Ha’u hatete de’it ba Prezidente katak ne’e kompoténsia Prezidente nian no ita hotu hein rezultadu hosi Tribunál Rekursu kona-ba lei ne’e”, katak.
Tuir Lú-Olo, Taur Matan Ruak fó prazu durante loron lima ba Tribunál Rekursu kona-ba konstitusionalidade lei eleisaun parlamentár.
Jornalista: Agapito dos Santos
Editora: Rita Almeida
