DILI, (TATOLI)—Polísia Nasionál Timor-Leste (PNTL) lansa tan Normas Organizasaun Prosedementu (NOP) nu’udar padraun ida atu orienta polísia munisípiu sira hala’o servisu iha ámbitu garante seguransa iha ida-idak nia fatin.
Segundu Komandante Jerál PNTL, Komisariu Faustino da Costa dehan komandante sira tenke halo esforsu lé hodi komprende.
“Ohin halo lansamentu ba NOP kompostu padraun tolu ba Ofisiál Polísia Suku (OPS), Konsellu Polísiamentu Komunitáriu (KPK) ho mós Konsellu Seguransa Munisípiu no Rejiaun (KSM/KSR). Komadante sira tenke tenta lé komprende atu hatutan ba OPS sira ho mós parseiru iha membru konsellu rua ne’e”, Komisariu Faustino da Costa informa ba jornalista sira iha Kuartel Jerál PNTL Kaikoli Dili, sesta (12/5).
Padraun ne’e nia objetivu mak orienta servisu polísia nian iha terenu bainhira hala’o kna’ar sei laiha duvida ba saida mak sira tenke halo no saida mak labele atu halo.
OPS hanesan ajente polísia nian atu hakbesik-án ba komunidade ne’ebé hela iha teritoriu tomak iha sidade ka suku hodi promove estabilidade no seguransa, prevene krime ka konflitu no kolabora ho lider komunitaria hodi garante trankuilidade públika hodi kontribui ba dezenvolvimentu nasionál no mudansa sosiál.
Responsabilidade OPS nian mak, halo edukasaun sivika, proativu no iha vizibilidade hodi asegura estabilidade iha suku laran, prevensaun konflitu, halibur dadus no fó apoiu ba atividade iha suku laran.
KPK nu’udar forum ka mekanismu iha ne’ebé polísia ho komunidade bele tur hamutuk hodi diskute, prevene, no rezolve problema balun ne’ebé mosu iha suku laran.
KPK mós iha misaun ida atu hametin seguransa públiku no promove koezaun sosiál.
KSM/KSR nu’udar konsellu ne’ebé kompostu hosi komandu PNTL munisípiu, administrasaun públiku no privadu, konfisoens relijioza, sosiedade sivíl no membru komunidade sira
NOP nia elaborasaun hahú kedan iha tinan 2015 hosi Departementu Polísia Komunitaria no hetan tulun hosi Fundasaun Asia, inklui Polísia Nova Zelandia.
Jornalista: Manuel Pinto
Editora: Rita Almeida
Notisias nee foun maibe hare iha fotografia Presidente
Republika TMR no PM Rui Araujo fali ne….too agora PNTL seidauk troka foto ga?????