DILI, (TATOLI) – Komandante Polísia Nasionál Timor-Leste (PNTL) Munisípiu Díli, Pedro Belo apela ba Partidu Polítiku (ParPol) sira atu fó oráriu kampaña ne’ebé klaru, tanba hosi oráriu kampaña membru PNTL sira sei halo planu seguransa.
“Seguransa ne’e importante tebes, oráriu kampaña ne’ebé fó ba ami tenke klaru, tanba husi oráriu ne’e ami sei halo planu seguransa”, Pedro Belo hato’o iha ninian intervensaun iha sorumutuk ida konaba seguransa iha kampaña polítika eleisaun parlamentár foin lais ne’e iha Sentru Konvensaun Dili.
Nune’e nia haktuir, eleisaun prezidensiál balun mak tenke hadia, liu-liu oráriu kampaña. “Oráriu kampaña mak fó ba CNE no CNE fó ba polísia sira katak partidu A halo kampaña iha Dili laran, to’o tempu ami rona fali partidu A halo kampaña iha fatin tolu ka haat kedan, entaun halo fali konfuzaun tanba la-halo tuir oráriu kampaña”.
Nia husu ba komunidade ne’ebé tuir kampaña, kumpri regras no oráriu, nune’e kampaña no eleisaun bele la’o ho di’ak to’o ikus bele forma governu foun ho di’ak.
Hodi dehan apela ba militante sira, atu disiplina no tuir dalan iha loron kampaña, respeitu ema seluk nia direitu atu labele mosu problema iha fatin hotu.
Nia fó hanoin, pozisaun PNTL atu asegura no atua ba ema ne’ebé halo krime, no laiha dame no hakmatek.
“Koordena malu didiak hodi nune’e asegura ita nia kampaña la’o di’ak, fiar katak ita nia kampaña sei la’o ho di’ak, tanba ita hotu hakarak rai ne’e hakmatek, iha dame nia laran”, tenik.
Sorumutuk ho tema “Garantia trankuilidade, dame, hakmatek no seguru iha perspetiva seguransa nasionál ba kampaña polítika eleisaun parlamentár 2017 iha kapital Dili hetan apóiu husi UNDP, Embaixadór Japaun no Australian Federal Police (AFP).
Jornalista: Julia Chatarina
Editora: Rita Almeida
