DILI, (TATOLI) – Komandu Polísia Provinsia Bali (POLDA), Inspetór Jenerál, Petrus Golose sei to’o iha aeroportu internasionál Nicolau Lobato Komoro ho jet privadu hodi simu fujitivu Polísia Repúblika Indonézia (POLRI) ne’ebé Polísia Nasionál Timor-Leste (PNTL) kaer, horseik.
Tuir informasaun ne’ebé ajénsia Tatoli asesu hosi embaixada Indonézia iha Timor-Leste, meudia ne’e katak, ulun boot polísia Provinsia Bali ne’e sei uza jet privadu hosi aeroportu Ngurah Rai Bali.
Antes ne’e hosi Bali informa, Diretór Sabhara POLDA Bali, Komisariu Polísia, I Gusti Bagus Suteja sei simu no halo serimonia termu entrega fujitivu sidadaun Grécia ne’ebé halai sai hosi komarka Grobokan Bali no ikus mai ka’er hosi parte PNTL iha Otel Novo Turizmu, horseik meudia.
Fujitivu sira ne’e halai mai Timor-Leste ho ró hosi Bali hafoin halo viajen hosi Atapupu, postu administrativu Belu, Timor Osidentàl.
Tuir fonte kredivél, nain rua ne’e hetan ona kaer hosi polísia imigrasaun Timor-Leste. Entretantu, nain tolu seluk halai sai hosi otel Novo Turizmu ho taxi kór kinur ba area Branca, Kristu Rei.
Ekipa Kobertura
http://www.tatoli.tl/2017/06/pntl-sei-intrega-georgios-nikolaos-cs-ba-polri/
